Փաստ ինֆո

ՀՀ առողջապահության նախարար Արսեն Թորոսյանը չի բացառել, որ կարող է ավելանալ կորոնավիրուսով վարակվածների թիվը։ «Չեմ բացառում, որ Էջմիածնում գրանցված կորոնավիրուսի խմբի հետ կապված կրկին դրական դեպքեր լինեն, սակայն քանի որ նրանք ի սկզբանե մեկուսացված են եղել այս զարգացումը կառավարելի է»։ Այս մասին այսօր ֆեյսբուքյան ուղիղ եթերում ասաց ՀՀ առողջապահության նախարար Արսեն Թորոսյանը։

Նա հայտնեց, որ  ներկայումս մեկուսացվել է մոտ 200 անձ կա թե՛ առանձին բնակավայրում, թե՛ շենքում. «Տրամաբանությունն այն է, որ մեկուսացված անձինք պետք է պարտադիր սերտ շփում ունեցած լինեն հաստատված ախտորոշումով պացիենտի հետ։ Կարող եմ ուրախությամբ ասել, որ Էջմիածնի դեպքի համաճարակաբանական հետազոտությամբ հայտնաբերել ենք գրեթե բոլոր շփվածներին և այդ աշխատանքները շարունակվում են»։

Թորոսյանը չի բացառել, որ  ինֆորմացիայի բացակայության պատճառով լինեն որոշ անձինք, որոնք չեն բացահայտվել, այդ իսկ պատճառով կոչ է արել  հետևել նախարարության հորդորներին. «Ոչ շտապ հանրային միջոցառումները խստորեն խորհուրդ եմ տալիս հետաձգել ու այս առիթն օգտագործել տանը մնալ և ոչ թե հանրային վայրեր այցելելու համար»։

Նա նշեց, որ պացիենտներից 14-ն իրենց բավարար են զգում, և միայն 1-ի մոտ կա թոքաբորբ, որը բժիշկների հսկողության տակ է։

«Չենք մոռանում մեր բոլորիս անձնական, սոցիալական պատասխանատվության մասին այս վարակիչ հիվանդության դեմ պայքարի գործում և պահպանելով այդ պարզ կանոնները այս փոքր-ինչ արտակարգ իրավիճակում՝ փորձում ենք ազգովի դրա դիմացն առնել»,-շեշտեց նախարարը։

Ավելի վաղ նախարարը հայտնել էր կորոնավիրուսով 15 հիվանդի առկայության մասին։

Մանրամասները՝ տեսանյութում։

Աղբյուր` Փաստինֆո