Փաստ ինֆո

Կորոնավիրուսը Հայաստանում նոր թափ է ստանում՝ արդեն ունենք 15 հիվանդ, եւս 200 մեկուսացված անձ, որի պայմաններում Համապետական նշանակություն ունեցող սահմանադրական փոփոխությունների հանրաքվեի անցկացումը վիճահարույց է. Խորհրդարանական ընդդիմությունը գտնում է, որ այն չպետք է կայանա, սակայն իշխող ուժի՝ «Իմ քայլի» պատգամավորները որոշ զգուշավորություն են ցուցաբերում իրենց գնահատականներում։ 

Հանրաքվեի չեղարկումը կարող է տեղի ունենալ միայն երկրում ռազմական եւ արտակարգ դրություն հաստատելու դեպքում, ստեղծված պայմաններն արդյոք բավարար են արտակարգ դրություն հայտարարելու համար։ «Փաստինֆո»-ն թեմայի շուրջ զրուցել է ԱԺ «Իմ քայլը», «ԲՀԿ», «Լուսավոր Հայաստան» խմբակցությունները ներկայացնող պատգամավորների հետ։

«Իմ քայլը» խմբակցության պատգամավոր Սուրեն Գրիգորյանը ձեռնպահ մնաց դիրքորոշում հայտնել՝ երկրում արտակարգ դրություն հայտարարելու հարցի վերաբերյալ՝ նշելով, որ այս հարցն իր մասնագիտական տիրույթում չէ, ուստի չի կարող պատասխանել։

«Եթե կասեն, որ դրա անհրաժեշտությունը կա՝ իրավական ընթացակարգերի մասով մասնագիտական կարծիք կհայտնեմ։ Ես չեմ կարող Ձեր հարցին պատասխանել, քանի որ դա մասնագիտական է, այլ բան է, որ շատերն այս հանգամանքը հաշվի չեն առնում ու հետևություններ են անում, սակայն ես այդ գայթակղությանը չեմ տրվի»,-ասաց Գրիգորյանը։

«Իմ քայլը» խմբակցության պատգամավոր Գևորգ Պապոյանի դիտարկմամբ՝ արտակարգ դրություն հայտարարելու համար գոյություն ունեն կոնկրետ կարգավորումներ, հանրաքվեի կասեցումն արտակարգ դրությամբ չի լինում, այլ արտակարգ իրավիճակների հետ կապված օրենքով։ «Ես դրա շուրջ կարծիք չունեմ, ըստ անհրաժեշտության գործողություններն իրականացվում են»,-ասաց Պապոյանն ու ընդգծեց, որ կարևորը ՀՀ քաղաքացիների առողջությունն է և ոչ թե հանրաքվեն։

«Իմ քայլը» խմբակցության պատգամավորի խոսքով, իշխող ուժն իր քայլերն արել է, անում է և կանի քաղաքացիների առողջությունից ելնելով։

Պապոյանն ընդգծեց՝ բոլոր գործողությունների նպատակը ՀՀ քաղաքացիների առողջությունը պաշտպանելն է. «Հիմա կառավարությունն օպերատիվ ռեժիմով աշխատում է, ու մենք էլ որոշ գործողություններ ենք ձեռնարկում, որոնք ստեղծված իրավիճակի տրամաբանության մեջ են։ Գիտեք, դպրոցները, բուհերն ու մանկապարտեզները փակվեցին, կենտրոնական բանկը շատ ակտիվ աշխատում է առկա կանխիկ դրամը նոր դրամական միջոցներով փոխելու ուղղությամբ, բանկերը տարբեր գործողություններ են ձեռնարկում, վարչապետը կոչ արեց չմասնակցել մեծ միջոցառումներին, սրանք բոլորը գործողություններ են, որոնք միտված են մեր քաղաքացիների հանրային առողջության պահպանմանը»։

«Բարգավաճ Հայաստանի» պատգամավոր Գևորգ Պետրոսյանը «Փաստինֆո»-ի հետ զրույցում ասաց, որ բնակչության առողջության պահպանման շահը գերակա է՝ ՍԴ-ն սեփական անդամներով համալրելու ցանկությանը։

«Ես ընդհանրապես հանրաքվեին դեմ եմ, նաև մեր խմբակցությունն է իր դիրքորոշումը հայտնել։ Հիմա արդեն այլ հարց է, թե ինչ հիմքով է չեղարկվում։

Իհարկե, հանրային անվտանգության շահը գերակա է, և անձամբ իմ կարծիքով ճիշտ կլինի չեղարկել հանրաքվեն։ Ի սկզբանե ասել ենք, որ դա ապօրինի գործընթաց է ու չեմ կարծում, թե ՍԴ-ն սեփական ցանկալի անդամներով համալրելու ցանկությունն այնքան կարևոր է, որ գերակայի բնակչության առողջության պահպանման շահին»,-ասաց ԲՀԿ խմբակցության պատգամավորը։

Ընդդիմադիր երկրորդ խմբակցության՝ «Լուսավոր Հայաստանի» պատգամավոր Տարոն Սիմոնյանն էլ նշեց, որ եթե հանգամանքներն այնքան են սրվել, որ իրավիճակը վերահսկողությունից դուրս է գալիս և պետք է խույս տալ մարդաշատ հավաքներից, վարակի տարածումից, ապա բնականաբար պետք է նման դրություն հայտարարել ու հետաձգել հանրաքվեն։

Հարցին, թե պատգամավորի կարծիքով ներկայումս այդպիսի իրավիճակ կա՞, Սիմոնյանը պատասխանեց. «Ինքներդ եք տեսնում, որ դպրոցները, մանկապարտեզները, հանրային վայրերը փակվում են, ինչ հույս ունեք, որ ապրիլի սկզբին այս իրավիճակն այլևս չի շարունակվի, դրա համար պետք է կանխարգելիչ միջոցառումներ հենց հիմա կազմակերպել»։

Նշենք, որ այսօր լրատվականներից մեկի հետ զրույցում ԿԸՀ նախագահ Տիգրան Մուկուչյանը հայտնել է, որ հանրաքվեի կասեցման համար օրենքը նախատեսում է 2 ձեւակերպում ՝ ռազմական կամ արտակարգ դրության հայտարարում. «Նշվածով պայմանավորված, եթե համապատասխան ընթացակարգերով կլինեն որոշակի իրավական ակտեր, որոնք կվերաբերեն գործընթացը կասեցնելուն, այդ դեպքում կկասեցվի գործընթացը»:

Ռազմական ու արտակարգ դրություն հաստատելու մասին կարգերը սահմանվում են ՀՀ Սահմանադրության 119-րդ եւ 120-րդ հոդվածներով։
Ըստ այդմ՝ ռազմական դրություն կարող է հայտարարվել՝ Հայաստանի Հանրապետության վրա զինված հարձակման, դրա անմիջական վտանգի առկայության կամ պատերազմ հայտարարվելու դեպքերում։ Ռազմական դրության իրավական ռեժիմը սահմանվում է օրենքով, որն ընդունվում է պատգամավորների ընդհանուր թվի ձայների մեծամասնությամբ:

Իսկ Սահմանադրական կարգին սպառնացող անմիջական վտանգի դեպքում Կառավարությունը հայտարարում է արտակարգ դրություն, եւ ձեռնարկում իրավիճակից բխող միջոցառումներ և այդ մասին ուղերձով դիմում է ժողովրդին:

Հեղինակ՝ Սոնա Գեւորգյան

Աղբյուր` Փաստինֆո