Փաստ ինֆո

Բարձրագույն դատական խորհրդի անդամ Գրիգոր Բեքմեզյանը չի կարծում, թե ԲԴԽ-ն պետք է մեկնաբանի վարչապետ Նիկոլ Փաշինյանի այն հայտարարությունը, թե Վերաքննիչ քրեական դատարանը 5-րդ ալիքի սեփականատեր Արմեն Թավադյանի կալանքից ազատ արձակելու որոշումը կայացրել է  դավադրությունների արդյունքում է։

«Վարչապետի ասածը կարծեմ՝ դա իր կարծիքն էր եւ այլ անձի կարծիքը մեկնաբանելու իրավասություն ու ցանկություն ես չունեմ»,- «Փաստինֆո»-ի հետ զրույցում ասել է Բարձրագույն դատական խորհրդի անդամ Գրիգոր Բեքմեզյանը՝ անդրադառնալով Փաշինյանի հայտարարությանը եւ այն հարցին, թե արդյո՞ք ԲԴԽ-ն չի պատրաստվում անդրադառնալ հայտարարության մեջ նշված հանգամանքին։

Հիշեցնենք, որ Վերաքննիչ քրեական դատարանը՝ դատավոր Ալեքսանդր Ազարյանի նախագահությամբ, բավարարել էր 5-րդ ալիքի սեփականատեր Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը։ Մարտի 11-ին Թավադյանն ազատ էր արձակվել։ Դրան հաջորդել էր Ջերմուկում քարոզարշավ իրականացնող վարչապետ Փաշինյանի հայտարարությունը, թե մեր առաջին ռեակցիան այն է, թե այս ինչ դավադրությունների արդյունքում է նման որոշում կայացվել: «Ես չեմ ասում՝ էսօր դատարանը հիմքեր չի ունեցել ազատելու: Բայց խնդիրը սա է, որ մեր առաջին ռեակցիան այն է, թե այս ինչ դավադրությունների արդյունքում է նման որոշում կայացվել: Որովհետեւ, այո՛, դատական համակարգը՝ սկսած Սահմանադրական դատարանից, վերջացրած առաջին ատյանի դատարանով եւ վերաքննիչով, տեղ-տեղ ակնհայտորեն եւ բացահայտորեն ներգրավված են եղել քաղաքական պրոցեսների մեջ»,-հայտարարել էր Փաշինյանը:

«Դատական համակարգում դավադրության մասին ես տեղյակ չեմ եւ չեմ էլ կարող տեղյակ լինել այս պահին։ Նորից եմ ասում` դա  կարծիք է, որը հայտնվել է, ես երրորդ անձի կարծիքը մեկնաբանելու իրավունք չունեմ»,-ասել է  Գրիգոր Բեքմեզյանը։

 Հավելենք, որ դատավոր Ալեքսանդր Ազարյանը, որի որոշմամբ  ՀՀ 2-րդ նախագահ Ռոբերտ Քոչարյանի խափանման միջոց  կալանավորում վերացվել էր, «168 Ժամ»-ին տված հարցազրույցում Փաշինյանի հայտարարությանն անդրադառնալով ասել էր.« Կա՛մ թող դիմեին Բարձրագույն դատական խորհրդին (ԲԴԽ), կա՛մ Կարգապահական հանձնաժողովին, եթե ես նման բան էի ասել»։ 

ԲԴԽ անդամն այս հայտարարության առնչությամբ ասաց. «Մենք չենք  կարող հարց քննարկել, քանի դեռ չունենք որեւէ բողոք վարույթ հարուցող մարմնի կողմից, ուստի, մենք այս պահին որեւէ գործողություն անել չենք կարող։ Պարոն Ազարյանի  հայտարարությունները նույնպես չեմ պատրաստվում մեկնաբանել, քանի որ դա իր կարծիքն է»

Նշենք, որ նույն ՝ Արմեն Թավադյանի գործով դռնփակ նիստի վերաբերյալ հայտարարություններ էին արել փաստաբաններ Տիգրան Եգորյանն ու Կարապետ Բադալյանի։ Մասնավորապես, Եգորյանը հայտարարել էր, որ Վերաքննիչ դատարան բողոք է ներկայացվել, և բողոքի քննությունը իրականացնում է Ալեքսանդր Ազարյանը, որը հայտնի է դարձել Ռ. Քոչարյանի նկատմամբ կայացրած իր դատական ակտով «Նա որոշել էր, որ Ռ. Քոչարյանի նկատմամբ չի կարելի իրականացնել քրեական հետապնդում, քանի որ նա օգտվում է անձեռնմխելիությունից»,-կայքերից մեկի  տաղավարում հայտարարել էր փաստաբանը՝ ընդգծելով. «Հստակ է, որ այս դատավորը կողմնակալ է, անաչառ չէ և ինչ-որ խնդիր է ուզում սպասարկել, և այդ խնդիրը արդարադատության հետ աղերս չունի»։ Իսկ Կարապետ Բադալյանը հայտարարել էր, որ  դատավոր Ազարյանը իր անպատասխանատու պահվածքով և արտահայտություններով խոչընդոտում է արդարադատությանը:

Հարցին, արդյո՞ք այս հայտարարությունները դատավորի կայացրած դատական ակտով պայմանավորված ճնշում  չի դիտարկվում, Գրիգոր Բեքմեզյանն ասաց.  «Ես չեմ լսել Տիգրան Եգորյանի  ասածը, ոչինչ չեմ կարող ասել,  այդ հարցազրույցը ԲԴԽ-ում չի քննարկվել»։

Աղբյուր` Փաստինֆո