Փաստ ինֆո

«5-րդ ալիք» ՀԸ սեփականատեր Արմեն Թավադյանի նկատմամբ որպես խափանման միջոց ընտրված կալանավորումը վերացնելու մասին վերաքննիչ քրեական դատարանի որոշման դեմ դատախազությունը Վճռաբեկ բողոք կներկայացնի։ Այս մասին «Փաստինֆո»-ին հայտնեց ՀՀ գլխավոր դատախազի՝ ԶԼՄ-ների գծով խորհրդական Գոռ Աբրահամյանը։ Վերջինս տեղեկացրեց, որ Թավադյանի նկատմամբ որպես խափանման միջոց է ընտրվել ստորագրությունը չհեռանալու մասին։

«Դատախազի կողմից այդ խափանման միջոցն ընտրվել է Վերաքննիչ դատարանի կողմից համապատասխան որոշումը հրապարակելուց հետո»,- նշեց Աբրահամյանը։

Հիշեցնենք, որ ՀՔԾ-ն Արմեն Թավադյանին մեղադրում է «Մարտի 1»-ի գործով տուժողներից մեկին կաշառելու համար, որ դատարանում սուտ ցուցմունք տա։ Նրա դեմ ցուցմունք է տվել Ռ.Քոչարյանի մեկ այլ ենթադրյալ աջակից՝ Վ.Մկրտչյանը, որը նախ ձերբակալվել էր, ապա ազատ արձակվել՝ Թավադյանի ձերբակալությունից հետո։

Ա.Թավադյանը չի ընդունում առաջադրված մեղադրանքը, իսկ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը, հայտարարել է, որ տուժողներին կաշառելու անհրաժեշտություն չկա եւ չի եղել, քանի որ քրեական գործում չկա Ռ.Քոչարյանի դեմ որեւէ ցուցմունք, որը փոխելու կարիք լինի։

Թավադյանը կալանքի տակ է գտնվել ավելի քան երկու ամիս. նա կալանավորվել էր 2019 թվականի դեկտեմբերին, իսկ 2020 թվականի
փետրվարի 19-ին Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ բավարարեց Արմեն Թավադյանի կալանքի ժամկետը ևս երկու ամսով երկարացնելու մասին ՀՔԾ քննիչի միջնորդությունը, թեեւ քրեական գործով նախաքննությունը գտնվում էր ավարտական փուլում։

Պաշտպանները ընդհանուր իրավասության դատարանի որոշման դեմ ներկայացրել էին վերաքննիչ բողոք, որը մակագրվել էր Վերաքննիչ քրեական դատարանի դատավոր Ալեքսանդր Ազարյանին եւ մարտի 11-ին հայտնի դարձավ, որ դատարանը բավարարել է պաշտպանների բողոքը եւ նույն օրը Թավադյանն ազատ է արձակվել «Երևան-Կենտրոն» ՔԿՀ-ից։ Վերաքննիչ քրեական դատարանը գտել էր, որ նրան առաջադրված մեղադրանքում բացակայում է հիմնավոր կասկածը։

Այսօր, դատախազությունը հայտարարել է, որ կներկայացնի վճռաբեկ բողոք՝ պահանջելով կալանավորել Արմեն Թավադյանին։ Այսինքն՝ այս դեպքում դատախազությանը պահանջվել է ընդամենը 3 օր՝ վերաքննիչ քրեական դատարանի որոշման վերաբերյալ կարծիք ձեւավորելու համար, մինչդեռ փոխգնդապետ Արա Մխիթարյանի ծեծի գործով դատախազությունն առ այսօր որեւէ կարծիք չի հայտնել մեղադրյալին գրավով ազատ արձակելու դատարանի որոշման առնչությամբ։ Ինչպես արդեն հայտնել ենք՝ փոխգնդապետն ավելի քան 6 ամիս է , ինչ գտնվում է կոմայի մեջ, իսկ նրա նկատմամբ բռնություն գործադրելու մեջ մեղադրվող Վայոց Ձորի նախկին մարզպետ Տրդատ Սարգսյանի օգնականի եղբորը՝ Զավեն Գրիգորյանը մարտի 6-ին գրավի դիմաց ազատ է արձակվել։ Այս օրերին նրա հարազատներն ու զինակիցները բազմաթիվ բողոքի ակցիաներ են իրականացրել՝ պահանջելով արդարություն ու սպային դաժանաբար ծեծի ենթարկած անձի կալանավորում, սակայն դատախազությունը ձեռնպահ է մնացել դիրքորոշում հայտնելուց։

Նշենք, որ սպային ծեծելու մեջ մեղադրվողին գրավով ազատ արձակելու որոշումը կայացրել է Վերաքննիչ քրեական դատարանի դատավոր Արմեն Դանիելյանը, ով համարվում է վատագույն վարկանիշն ունեցող դատավորը։ Արմեն Դանիելյանը 2019թ.-ին եղել ամենացածր վարկանիշն ունեցող դատավորը՝ -43 միավորով։ Թեև 2020թ նոր է սկսվել, բայց Դանիելյանն այս պահի դրությամբ կրկին համարվում է ամենացածր վարկանիշն ունեցող դատավորը՝ -14 միավորով։

Հեղինակ՝ Իզաբել Սահակյան

Աղբյուր` Փաստինֆո