Փաստ ինֆո

Հայաստանում փոքր բիզնեսի ներկայացուցիչներն իրենց տարեկան շրջանառությունն ապահովում են Իրանից և Չինաստանից բերված ապրանքները վերավաճառելով, ապա տնտեսական առումով կորոնավիրուսն էական ազդեցություն կարող է ունենալ թե՛ քաղաքացիների գրպանի համար, թե՛ փոքր բիզնեսի տեսանկյունից։ Այսօր լրագրողների հետ հանդիպման ժամանակ նման մտավախություն հայտնեց Հայաստանի գործատուների միության նախագահ, ՀԽ անդամ, տնտեսագետ Գագիկ Մակարյանը։ Վերջինս ներկայացրեց կորոնավիրուսի հնարավոր բացասական ազդեցությունը տնտեսության վրա։

Տնտեսագետի խոսքով Իրանը և Չինաստանն արտաքին առևտրի երկու կարևոր, խոշոր պետություններ են։ Արտաքին առևտրի ընդհանուր ծավալների մեջ Հայաստանի համար կազմում են մոտ 9 տոկոսը և նրանց բաժին է ընկնում ավելի քան 560-580 մլն դոլար տարեկան շրջանառությամբ, հետևաբար երկու երկրների կորոնավիրուսով վարակվածությունը կարող է ստեղծել մատակարարման խզումներ և այդ երևույթը, ըստ տնտեսագետի, աստիճանաբար նկատելի է.

«Գործող պայմանագրերը կարող են դադարեցվել, նոր պայմանագրեր չեն կնքվի, կամ մատակարարումներ տեղի չեն ունենա, գործուղումներ չեն լինի՝ նոր պայմանագրեր, նոր բիզնես համագործակցություն զարգացնելու համար և դա հատկապես մատակարարման մասով կարող է էականորեն Հայաստանի տնտեսությանը խոչընդոտել։ Այդ նշված գումարի մոտ 85 տոկոսը ներմուծմանն է վերաբերում, այլ ոչ թե արտահանմանը»,-նշեց Գագիկ Մակարյանը։
Վերջինս նկատեց՝ այս երկրները Հայաստանի համար կրկիտիկական են նաև այն պատճառով, որ էժան մատակարարող երկրներ են։ Հայաստանում էժան ապրանքները հիմնականում ներմուծվում են Չինաստանից և Իրանից։ Դրանք էժան սարքավորումներ, տեխնոլոգիաներ, էլեկտրոնային սարքեր են, հագուստ և այլն։

«Քանի որ Հայաստանն ունի աղքատության և գործազրկության խնդիրներ, հետևաբար նաև շատ միկրո և փոքր բիզնեսի ներկայացուցիչներ իրենց առևտուրը, իրենց տարեկան շրջանառությունն ապահովում են այդ երկրներից բերված ապրանքները վերավաճառելով, ապա տնտեսական առումով էական ազդեցություն կարող է ունենալ թե՛ քաղաքացիների գրպանի համար, թե՛ փոքր բիզնեսի տեսանկյունից»,-ընդգծեց Գագիկ Մակարյանը։

Կորոնավիրուսը կհարվածի նաև Հայաստանի զբոսաշրջությանը, փոքր բիզնեսին և հատկապես ծառայությունների ոլորտին։ Գագիկ Մակարյանի խոսքով, եթե մեր ՀՆԱ-ի մեջ ծառայությունների ոլորտն ունի էական դերակատարություն, ապա այս տարի կունենանք նվազումներ։

Տնտեսագետը գտնում է՝ կառավարությունը կորոնավիրուսի հետ կապված որոշակի կանխարգելիչ քայլեր պետք է կատարի, որը Գագիկ Մակարյանի կարծիքով հստակ նկատելի չէ դեռևս. «ՊԵԿ-ի մաքսային բաժնից կարելի էր տեղեկանալ, թե մատակարարումներն Իրանից և Չինաստանից հատկապես որ տարածաշրջանից են կատարվում, արդյոք այդ տարածաշրջանները կորոնավիրուսի համար կրիտիկական շրջաններ են, թե ոչ։ Եթե այդպիսին է, ապա դրանք շատ արագ պետք է դադարեցվեն։ Մյուս կողմից էլ պետությունը կարող է օգնել, որ դադարեցվող պայմանագրերը ֆինանսական հետևանքներ չունենան, քանի որ ֆորսմաժորային իրավիճակում ենք»,-հավելեց տնտեսագետը։

Փոքր և միջին բիզնեսի եկամտաբերությունն ավելի կնվազի, նրանք ավելի կաղքատանան։

Հեղինակ՝ Հասմիկ Կոշկարյան

Աղբյուր` Փաստինֆո