Փաստ ինֆո

Նավթի էժանանալը Հայաստանի համար կարող է նավթամթերքի որոշակի էժանեցման բերի, բայց մեզ համար ավելի վտանգավոր է դրա ազդեցությունը ռուբլու վրա։ Այսօր հրավիրված մամուլի ասուլիսի ժամանակ ասաց Հայաստանի գործատուների միության նախագահ, ՀԽ անդամ, տնտեսագետ Գագիկ Մակարյանը։

«Ինչքան էլ նավթն էժանանա, չենք կարող ասել դա լավ է, քան արտահանողների տուժելը, որովհետև Ռուսաստանն արտահանման մեջ Հայաստանի առաջին գործընկերն է։ Պետք է հաշվի առնենք, որ եթե այդ պրոցեսը երկարի, դա որոշակիորեն կարող է ազդել արտահանման ծավալների վրա և տնտեսական առումով խնդիրներ առաջացնի։ Եթե դա տևի մինչև մեկ ամիս, կարծում եմ էական ազդեցությունը քիչ կլինի»,-նշեց Գագիկ Մակարյանը։

Անդրադառնալով փոխարժեքին՝ տնտեսագետը կարծում է՝ Կենտրոնական բանկը կհետևի այդ ամենին։ Մասնագետի խոսքով ԿԲ-ն շատ լավ կարողանում է կարգավորել այդ մասով. «Եթե մենք հիմա թույլ տանք, որ մեզ մոտ արժեզրկվի դրամը, դոլարը կամ եվրոն արժևորվեն, ապա դա կրկնակի անգամ կազդի մատակարարման ռեժիմի վրա։ Կունենանք թանկացումների խնդիր։ Մասնավորապես խուճապի դեպքում, եթե ապրանքներն արհեստականորեն սպառվում են, նորից պետք է ապրանքներ բերվեն և գումարներ են պետք։ Եվրոն, դոլարն արդեն թանկ գնով պետք է ձեռք բերեն ու կստացվի, որ մատակարարման ռեժիմի դիսբալանս կառաջացնենք»,-ասաց Գագիկ Մակարյանը։

Վերջինս գտնում է՝ ԿԲ-ն այստեղ այլ անելիք ունի. «Եթե ռուբլու հետ կապված պատմությունը շարունակվի, և եթե ռուբլին կորցնի իր բալանսավորման ռեժիմի հատկությունները, բեռն ընկնում է դոլար/եվրո կողմի վրա և այստեղ էլ կարող են տնտեսական որոշակի իրադարձություններ կատարվեն»,-ընդգծեց Գագիկ Մակարյանը։

Աղբյուր` Փաստինֆո