Փաստ ինֆո

Կոտայքի մարզի ընդհանուր իրավասության դատարանը պայմանականորեն ազատել է կնոջը՝ իրեն հայհոյած տղամարդուն դանակահարելու համար պատժի կրումից։

«Փաստինֆո»-ի հաղորդմամբ՝ դեպքը տեղի է ունեցել Կոտայքի մարզի «Գառնու ձոր» կոչվող տարածքում՝ տուժողի ավտոմեքենայում։ Կինը նստած է եղել աավտոմեքենայի դիմացի նստատեղին՝ վարորդի կողքը, ւնցաղային հարցերի շուրջ առաջացած տարաձայնության ժամանակ տղամարդը հայհոյել է կնոջը և նրա մորը, ինչը վերաճել է վիճաբանության, որի ընթացքում կինն աջ ձեռքում գտնվող դանակով հարվածել է տղամարդու որովայնի միջնամասին՝ պատճառելով ծանր վնաս' կյանքին վտանգ սպառնացող:

Կնոջը մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ մեկ ուրիշին մարմնական վնաս պատճառելու համար։ Վերջինս ընդունել է առաջադրված մեղադրանքը եւ միջնորդել արագացված կարգով քննությունն իրականացնել, ինչի դեմ չի առարկել մեղադրող կողմը, այդ թվում տուժողը։ Ավելին՝ վերջինս հայտարարել է, որ հաշտվել է ամբաստանյալի հետ և չի ցանկանում, որ իրեն դանակահարած կինը ազատազրկվի։

Հաշվի առնելով վերոգրյալ հանգամանքները՝ Կոտայքի մարզի ընդհանուր իրավասության դատարանը՝ դատավոր Վարդան Ստեփանյանի նախագահությամբ, մեղավոր է ճանաչել գործով ամբսատնյալ կնոջը, նրան դատապարտել 3 տարվա ազատազրկման, սակայն պայմանականորեն չի կիրառել պատիժը՝ նշանակելով փորձաշրջան 1 տարի ժամկետով։

Աղբյուր` Փաստինֆո