Փաստ ինֆո

Արցախում կայանալիք նախագահական եւ խորհրդարանական ընտրությունների քարոզարշավը բնականոն հունով ընթանում է։ Նոր կորոնավիրուսի վտանգով պայմանավորված Քարոզարշավը դադարեցնելու եւ ընտրությունները հետաձգելու անհրաժեշտություն այս պահին չկա։

«Փաստինֆո»-ի հետ զրույցում այս մասին ասաց «Արցախի պահպանողական կուսակցության» նախագահ, նախագահի թեկնածու, Արցախի նախագահի մամուլի քարտուղար Դավիթ Բաբայանը։

«Պետությունը իրականացնում է համապատասխան գործառույթներ, պրոֆիլակտիկ աշխատանքներն իրականացվում են, որպեսզի հասարակությունը պատրաստ լինի եւ կորոնավիրուսի վտանգը մինիմալացվի կամ ընդհանրապես չեզոքացվի»,-նշեց Դավիթ Բաբայանը։

Հիշեցնենք, որ այսօր ՀՀ առողջապահության նախարար արսեն Թորոսյանը հայտնեց կորոնավիրուսի եւս 2 դեպքի մասին, այսինքն վերջին տվյալներով, Հայաստանում արձանագրվել է կորոնավիրուսի 8 դեպք։ Իսկ նախօրեին, արձակուրդում գտնվող ՀՀ վարչապետ Նիկոլ Փաշինյանը հայտարարեց արձակուրդը դադարեցնելու եւ աշխատանքի անցնելու մասին։

Արդյո՞ք Հայաստանում արձանագրված դեպքերը ռիսկեր չե՞ն ստեղծի նաեւ Արցախի համար։ Դավիթ Բաբայանի խոսքով, Արցախում իրավիճակը տագնապալի չէ, որեւէ դեպք չի արձանագրվել եւ այս պահի դրությամբ քարոզարշավը դադարեցնելու եւ ընտրությունները հետաձգելու մասին որեւէ քննարկում չկան։ «Պետք է ամեն ինչ անել, որպեսզի թույլ չտանք , որ այդ վտանգը համաճարակ դառնա։ Կարծում եմ, որ ճիշտ աշխատանքների դեպքում հնարավոր կլինի դա անել»,-ասաց Դավիթ Բաբայանը։

Հավելենք, որ նախօրեին  հղում անելով Արցախի Հանրապետության առողջապահության նախարարության վրա, «Փաստինֆո»-ն տեղեկացրել էր, որ Արցախում կորոնավիրուսով վարակման դեպք չի գրանցվել: Նոր կորոնավիրուսի ներթափանցումը կանխարգելելու նպատակով ԱՀ կառավարության կողմից միջոցներ են ձեռնարկվել անհրաժեշտ պարագաների պաշար ստեղծելու համար: Ձեռք են բերվել կորոնավիրուսից պաշտպանվելու վերաբերյալ պաստառներ, տարբեր տեսակի դիմակներ, պաշտպանիչ միջոցներ, ախտահանիչ լուծույթներ, հեռահար ջերմաչափեր, միանգամյա օգտագործման խալաթներ, ձեռնոցներ, գլխարկներ, բախիլներ ու այլ պարագաներ, որոնք բաշխվել են ըստ նշանակության:

Արցախում ընտրությունները տեղի կունենան մարտի 31-ին։

Աղբյուր` Փաստինֆո