Փաստ ինֆո

Հայաստան ժամանող բոլոր ուղևորներին հնարավոր չէ մեկուսացնել, ինչպես՝ որևէ երկրում։ Այս մասին լրագրողների հետ զրույցում ասաց ԱՆ նախարար Արսեն Թորոսյանը։ Վերջինիս խոսքով՝ ամեն ինչ արվում է միջազգային համաճարակային խորհուրդներին համապատասխան և մեկուսացում նախատեսված է հաստատված դեպքի և նրա անմիջական կոնտակտների դեպքում, ինչով և զբաղվում են։ Թորոսյանը նշեց, որ երեք պացիենտների հետ անմիջապես շփված անձանց մեկուսացրել են և աշխատանքներ են տարվում իրենց հետ շփում ունեցող անձանց շրջանակը պարզելու համար, որոնցից մեկ դեպքով շրջանակը մեծ է և հնարավոր է հասնի 50 մարդու։

Նրա խոսքով՝ Իտալիայի քաղաքացու շփումների շրջանակը ևս մեծ է։ «Հայաստանում իրականացվում են համաճարակային ամենախիստ միջոցառումները»,- նշեց Թորոսյանը՝ հավելելով, որ 24 ժամյա ռեժիմով վերահսկողություն է իրականացվում, որից ավել ցուցված չէ։ Թորոսյանի խոսքով՝ անցյալ տարի եղել են կարմրուկով բերովի դեպքեր, որը 10 անգամ ավելի վարակիչ է, քան կորոնավիրուսը և իրականացվել են նույն աշխատանքները, օրինակ՝ պարզվել է,թե որ ռեստորանում է հաց կերել և այլն։ Անդրադառնալով՝ ուսումնական հաստատություններում դասընթացներին և քարոզարշավին, Թորոսյանը նշեց, որ որոշումների առումով շտապել պետք չէ։ Թորոսյանը չբացառեց, որ հնարավոր է սահմանափակող միջոցառումներ իրականացվեն հանրային հավաքների հետ կապված։ Թորոսյանի փոխանցմամբ՝ մարտի 11-ի դրությամբ կորոնավիրուսով կարանտինով եղել է 41 անձ Ծաղկաձորում և 6 ընտանիք՝ Երևանում։ Թորոսյանը հորդորեց այն քաղաքացիներին, որոնք վերադարձել են համաճարակի օջախ հանդիսացող վայրերից,աշխատել ինքնամեկսուանալ և չզբաղվել ինքնաբուժմամբ։

Աղբյուր` Փաստինֆո