Փաստ ինֆո

Ամբողջ աշխարհում կորոնավիրուսի տարածման կանխարգելմանն ուղղված իրականացվում են նոր և ավելի խիստ միջոցառումներ։ Իտալիայի կառավարությունը հրամայել է փակել բոլոր խանութները, սրճարաններն ու ռեստորանները։ Նշենք, որ Իտալիայում կորոնավիրուսից մահացության դեպքերը 24 ժամվա ընթացքում 31 տոկոսով աճել է, ընդհանուր մահացածների թիվը հասցնելով 827-ի։

«Մենք փակում ենք խանութները, բարերը, փաբերը, ռեստորանները, գեղեցկության սրահները, բացառությամբ առաջին անհրաժեշտության ապրանքներ վաճառող խանութներից և դեղատներից։ Արտադրամասերը կարող են բաց մնալ, բայց պետք է խիստ միջոցառումների իրականացվեն։ Կգործեն նաև բանկերը, փոստերը, ֆինանսական ընկերությունները»,-այս մասին երեկ՝ մարտի 11-ին ասել է Իտալիայի վարչապետ Ջուզեպե Կոնտեն։

Ղազախստանի նախագահ Կասիմ-Ժոմարտ Տոկաևն էլ կորոնավիրուսի տարածումից խուսափելու նպատակով չեղյալ է հայտարարել Նուր Սուլթանում Հաղթանակի 75-ամյակին նվիրված զինվորական շքերթը։ Հանձնարարվել է հետաձգել նաև ավելի վաղ ծրագրված միջազգային համաժողովները։ Ղազախստանի առևտրային կենտրոններում չեն գործի նաև կինոթատրոնները։
Դանիայում կորոնավիրուսի վարակվածության դեպքերի աճով պայմանավորված կառավարությունը հանձնարարել է երկու շաբաթով փակել մանկապարտեզները, դպրոցները։ Պետական համակարգի բոլոր ոչ էական աշխատակիցները Դանիայում մարտի 13-ից հնարավորության դեպքում կաշխատեն տնից, հակառակ պարագայում նրանց վճարովի արձակուրդ կտրվի։

Հիշեցնենք, որ երեկ Առողջապահության համաշխարհային կազմակերպությունը հայտարարել է համաշխարհային համաճարակի՝ պանդեմիայի մասին։

ԱՀԿ ղեկավար Թեդրոս Գեբրեյեսուսը նշել է, որ վերջին երկու շաբաթվա ընթացքում Չինաստանի սահմաններից դուրս վարակման դեպքերի թիվն ավելացել է 13 անգամ, իսկ այն երկրների թիվը, որտեղ բռնկում է գրանցվել, եռապատկվել է:

Նշենք, որ երեկ Հայաստանում գրանցվել է կորոնավիրուսի ևս երեք դեպք։ Վարակվածներից մեկն Իտալիայի քաղաքացի է, իսկ երկուսը՝ Հայաստանի։ Երեքն էլ ժամանել են Իտալիայից և այժմ գտնվում են «Նորք» ինֆեկցիոն հիվանդանոցում։ Առողջապահության նախարար Արսեն Թորոսյանի խոսքով այս երեք անձանց հետ շփման ամբողջ շրջանակը՝ 57 անձ հայտնաբերվել և մեկուսացվել է։

Նշենք, որ Հայաստանում կորոնավիրուսի առաջին դեպքը գրանցվել է մարտի 1-ին Թեհրանից ժամանած ՀՀ քաղաքացու մոտ։ Նրա հետ շփման շրջանակը՝ 31 անձ մեկուսացված է Ծաղկաձորի «Գոլդեն փելես» հյուրանոցում։ Հավելենք, որ Հայաստանում դեռևս խոսք չի գնում ուսումնական հաստատությունները փակելու, ինչպես նաև հանրային միջոցառումները, այդ թվում քարոզարշավը հետաձգելու մասին։

Աղբյուր` Փաստինֆո