Փաստ ինֆո

Կորոնավիրուսով հիվանդները Հայաստան են եկել տարբեր օրերի՝ տարբեր չվերթներով եւ ոչ ուղիղ Իտալիայից։ Այս մասին լրագրողների հետ ճեպազրույցում ասաց Առողջապահության նախարար Արսեն Թորոսյանը։

Նրա փոխանցմամբ ՝ հիվանդներից մեկը Հայաստան է վերադարձել 2-3 օր առաջ, մյուս երկուսը ՝ 10 օր առաջ, բայց դեպքերը տարբեր են և համեմատել պետք չէ։Ավելին՝ Արսեն Թորոսյանը նշեց, որ դեպքերը հայտնաբերվել են գանգատների ի հայտ գալուց հետո, որովհետև գանգատ չկա, թեստավորումն անիմաստ է։

Դիտարկմանը, որ Էջմիածնում կորոնավիրուսով հիվանդ կնոջ մոտ գանգատները եղել են մարտի 7-ից, քանի որ վերջինս ջերմել է, Թորոսյանն ասաց, որ այցերի ժամանակ հիվանդը դիմադրություն է ցուցաբերել և ասել, որ ջերմություն չունի, բայց դրանից հետո շրջանակն արդեն պարզվել է, մոտ՝ 50 հոգի։ Թորոսյանի խոսքով՝ սոցիալական պատասխանատվությունը և ինքնագիտակցումը հիվանդության դեմ պայքարի գործում ամենաարդյունավետ միջոցն է։

Թորոսյանը նշեց, որ հիվանդության հետ կապված շատ հարցեր պարզ չեն ոչ մեկին և հստակ ասել, թե գաղտնի շրջանի ո՞ր օրվանից է անձը վարակակիր, դժվար է, բայց տարածման համար անհրաժեշտ է, որ վիրուսը դուրս գա մարդու օրգանիզմից և ընկնի մյուս մարդու օրգանիզմ։

Ավելին, նախարարը չի մանրամասնել, թե Իտալիայից Երեւան եկած ուղեւորը տարանցիկ ո՞ր երկրից է ժամանել, արդյոք այդ օդանավի ուղեւորները, այդ օրը օդանավակայանում նրանց սպասարկած աշխատակիցների ինքնությունը պարզվել է, թե ոչ, նրանք թեստավորվել են, թե ոչ։

Իսկ ճշգրտող հարցադրումներին ի պատասխան նախարարն ուղղակի կոպտեց լրագրողներին. «եթե մի հատ էլ ընդհատեք ինձ ես պարզապես կդադարեմ ձեր հարցերին պատասխանել»։

Աղբյուր` Փաստինֆո