Փաստ ինֆո

Այսօր Ջերմուկում «այո»-ի քարոզարշավի ժամանակ ՀՀ վարչապետ Նիկոլ Փաշինյանն անդրադարձել է Ամուլսարի հարցին։ Նա նշել է, որ եթե հեղափոխություն չլիներ՝ Ամուլսարի հանքը վաղուց շահագործվելիս կլիներ։ «Կոչ եմ անում բոլորին, չկորցնել հարգալից վերաբերմունքը նկատմամբ։ Այդ մարդիկ, ովքեր ուզում են կորցնել այդ հարգալից վերաբերմունքը, թող հիշեն իրենց հեղափոխությունից առաջ»,-ասել է Փաշինյանը։ Նա հայտնել է, որ անհամաձայնություն ունի և՛ այն բնակիչների հետ, որ ասում են հանքը պետք է չաշխատի, և՛ այն բնակիչների հետ, որոնք ասում են՝ հանքը պետք է աշխատի։ «Ես ասում եմ՝ մենք պետք է մինչև վերջ գնանք ճշմարտության հետևից, ընդ որում դա հեշտ ճանապարհ չէ, մեր այս վերջին ամիսների պատմությունը ցույց է տալիս, որ դա հեշտ ճանապարհ չէ»,-ասաց վարչապետը։

Նրա խոսքով, քարոզարշավի ընթացքում մարդկանց հետ խոսելիս չի մտածում, որ ամեն բան պետք է լինի ճշգրիտ, կատարյալ, ինքն այդ կատարելությանը չի ձգտում, որովհետև կարևորում է երկխոսությունը, որը կհանգեցնի բանավեճի։ «Երեկ ուրախությամբ արձանագրեցի, որ Ամուլսարի ուղղությամբ բավականին մեծ աշխատանք ենք արել։ «Էլլարդի» հայտնի եզրակացությունից հետո մեծ բանավեճ եղավ և այն, ցավոք սրտի, վերջնական չպատասխանեց հարցերին, որովհետև «Էլլարդը» արձանագրումներ արեց, բերեց փաստարկներ, «Լիդիանն» էլ բերեց իր հակափաստարկները։ Ես կարող եմ ասել, որ Ամուլսարի հարցում, եթե ոչ միակ, ապա այն քիչ մարդկանցից եմ, որ չունեմ ոչ մի շահագրգռություն, բացի ՀՀ շահից»,-ասաց Փաշինյանը։

Վարչապետը պատմեց, որ Կառավարությունը հարց է ձևակերպել, թե արդյոք Ամուլսարի շրջակա միջավայրի վրա ազդեցության գնահատականը գնահատվել է իր ճշմարտացիության աստիճանի հանգամանքով. «Բնապահպանության ներկայացուցիչները, որ այդ արձանագրումներն արել են, արդյոք ստուգել են դրանց ճշմարտացիությունը։ Եվ արդյոք իրենց պարտականության մեջ մտնում էր այդ ստուգումը։ Սա դեռ քննության մի ուղղությունն է։ Երկրորդ ուղղությունը հետևյալ հարցադրումն է՝ արդյոք նախկինում այստեղ արված հետազոտությունների արդյունքները հաշվի են առնվել հանքի հետ կապված պրոցեսներում։ Եվ երրորդ ուղղությունը՝ քննչական կոմիտեն կազմել է «Էլլարդի» ու «Լիդիանի» բանավեճի արդյունքում 154 հարց, որն առաջիկայում կուղարկվի շահագրգիռ հկ-ներին ու գիտությունների ակադեմիային՝ ճշտելու համար»։

Փաշինյանն ընդգծեց՝ օդին որևէ «սպառնալիք» չպետք է լինի և Ջերմուկի օդը պետք է մաքուր մնա, ապա ավելացրեց՝ թույլ չի տա Ջերմուկի ջուրն աղտոտեն։ «Պետք է հասկանալ՝ հնարավո՞ր է հանքը շահագործել այնպես, որ ոչ միայն Ջերմուկի, այլև հարակից տարածքները չաղտոտեն։ Այս ճշմարտության հետևից պետք է գնանք, եթե հնարավոր է, դա այլ իրավիճակ է, եթե ոչ՝ ուրեմն այդտեղ քննարկման թեմա չկա»,-ասաց վարչապետը։

Աղբյուր` Փաստինֆո