Փաստ ինֆո

«Ես վստահ եմ, որ իրենք իջնելով գետին հասկացել են, որ համացանցում տիրող իրավիճակը, ֆեյքերի ուռաները եւ իրականությունը իրար չեն համապատասխանում, մարդիկ ուզում են հասկանալ, դեռ քանի՞ տարի պիտի մերժեն նախկիններին»,-«Փաստինֆո»-ի հետ զրույցում նման կարծիք է հայտնել «Բոյկոտ» նախաձեռնության լիազոր ներկայացուցիչ Վահագն Չախալյանը՝ անդրադառնալով ապրիլի 5-ին սպասվող հանրաքվեին ։

«Բոյկոտ» նախաձեռնությունն առաջիկայում քարոզարշավ կսկսի։ Այս նպատակով արդեն հանգանակություն են սկսել։ Ըստ ամենայնի, «Բոյկոտ»-ը քարոզարշավը կմեկնարկի մայրաքաղաքից։

«Մենք դեռեւս փետրվարի 13-ին էինք հայտարարել, որ այդ հանրաքվեն ապօրինի է, մենք հայտարարել էինք, որ հարցը կարելի էր լուծել առանց հանրաքվեի եւ այս իրավիճակում, երբ հասարակությունը առանց այն էլ պառակտված է, ավելորդ անգամ իրավիճակը սեւ-սպիտակի բաժանելը վտանգավոր է։ Իհարկե, մենք հասկանում ենք, որ առանց այդ բաժանման, առանց «հների վերադարձի» պայմանական բոբոյով վախեցնելու, «այո»-ի քանակն ապահովելն անհնար է լինելու»,-կարծում է Վահագն Չախալյանը։

Նրա խոսքով, իշխանությունները հերթական անգամ փորձում է մանիպուլացնել ժողովրդին, ասել, որ այ տեսեք, եթե «այո» չասեք, հները կվերադառնան։ Չախալյանի համոզմամբ, սա հավելյալ պառակտում է առանց այն էլ պառակտված հասարակությունը։

«Մեր բոյկոտը անվանել ենք «Բոյկոտի եւ համերաշխության հաստատման շտաբ» եւ մեր քարոզարշավն էլ այդ համերաշխության ու միասնության գաղափարների շուրջ ենք տանելու»,-ընդգծում է մեր զրուցակիցը՝ շարունակելով. «Մարդկանց բացատրելու ենք, որ չտրվեն ավելորդ զգացմունքների, չընկնեն սեւերի ու սպիտակների թակարդը։ Անշուշտ, մենք հայտարարել ենք, որ բոլոր նրանք, ովքեր թալանել են երկիրը, ըստ օրենքի, եթե փաստեր կան, պետք է պատասխանատվության ենթարկվեն, բայց այսպես հայտարարել, որ բոլորը մեղավոր ու հանցագործ են, անընդունելի է մեզ համար»։

Նշենք, որ նախօրեին արձակուրդում գտնվող վարչապետ Նիկոլ Փաշինյանի գլխավորությամբ «Այո» քարոզչական կողմը ակտիվ քարոզարշավի մեկնարկը տվեց Սյունիքում։ Նիկոլ Փաշինյանի հանդիպումների ժամանակ կարմիր թելի պես անցնում է Սահմանադրական դատարանի գործող կազմը այսպես ասած, նախկինների հետ ասոցացնելու նրանցից ազատվելու անհրաժեշտության մասին թեզը։ Հիշեցնենք, որ հանրաքվեով իշխանությունը մտադիր է Սահմանադրության մեկ հոդվածի փոփոխությամբ դադարեցնել ՍԴ գործող 9 դատավորներից 7-ի՝ այդ թվում ՍԴ նախագահ Հրայր Թովմասյանի լիազորությունները, որոնց Նիկոլ Փաշինյանը համարում է «քոչարյանասերժական ժառանգության վերջին մնացորդը»։

Վահագն Չախալյանի խոսքով, «Այո» քարոզչական կողմը դիմում է մանիպուլյացիայի եւ չի խոսում բուն նյութից, թե ինչի համար է կազմակերպվել հանրաքվեն։ «Չնայած սրան, մարդիկ հասկանում են, որ նախկիններին 2 տարի առաջ են մերժել եւ ամեն 2 տարին մեկ նախկիններին մերժել հնարավոր չէ։ Քաղաքացիների մեծամասնության համար այդ հայտարարություններն այնքան էլ համոզիչ չեն։ Չգիտեմ, «Այո»-ի շտաբը ինչ հնարքով է կարողանալու ապահովել անհրաժեշտ քանակի քվեներ»,-նշում է Չախալյանը հարցնելով, թե արդյո՞ք նախկին չէ ԿԸՀ նախագահ Տիգրան Մուկուչյանը։

Հարցին, հաշվի առնելով, որ հանրաքվեի դրված հարցը իշխանությունն ամենաբարձր մակարդակով մանիպուլացնում է, վտանգ չկա՞, որ հետագայում նույն ճանապարհով իշխանությունը կփորձի , օրինակ հանրաքվեով անցկացնել աղմկահարույց Ստամբուլյան կոնվենցիան՝ կրկին օգտագործելով քարոզչության մանիպուլյատիվ մեթոդները, Վահագն Չախալյանն ասաց. «Մենք երեկ հայտարարել ենք, որ պետք է հստակ բարձրաձայնվի դիրքորոշումը նույն Ստամբուլյան կոնվենցիայի հետ կապված, որովհետեւ, այո, մենք տեսնում ենք վտանգ։ Մենք նաեւ տեսնում ենք վտանգ, որ եթե «այո»-ն հաղթի, սահմանադրական ճգնաժամ է լինելու ու հստակ չէ, թե այն որքան է տեւելու»։

Աղբյուր` Փաստինֆո