Փաստ ինֆո

«Եթե ինձ ձայն տար ընտրողների երեսունքանի տոկոսը, ես ինձ շատ համեստ կպահեի, ես կմտածեի, որ այն 67 տոկոսի քվեն չունեմ եւ քայլեր պետք է անեմ, որ այդ մարդիկ էլ դեպի ինձ գան։ Ես ամպագոռգոռ հայտարարություններ չէի անի, թե ժողովրդի իշխանություն է»,- «Փաստինֆո»-ի հետ զրույցում այս մասին ասաց քաղաքական վերլուծաբան Արծրուն Պեպանյանը՝ անդրադառնալով ապրիլի 5-հանրաքվեի հռչակագրին, որը ժողովրդի անունից հրապարակել է վարչապետ Նիկոլ Փաշինյանը։

Բանախոսը միեւնույն ժամանակ ասաց, որ արդեն մեկ տարուց ավելի է՝ չի հետեւում Փաշինյանի ելույթներին, որովհետեւ զգում է, որ վարչապետն ու իր թիմը իրական, լուրջ խնդիրները տեսնելու ու դրանց մեջ խորանալու հատկություն չունեն. «Իրենք նման են բժշկի, որը չունի ախտորոշումը, բայց ուզում է մի բան անել։ Ես առանձնապես չեմ հետեւում իրենց ելույթներին, ինձ հիմա առավելապես մտահոգում է այն հարցը, թե ինչ քայլեր կարող ենք անել ժողովրդի առողջ հատվածի հետ, որպեսզի կարողանանք երկիրը հանել այս վիճակից, որովհետեւ իշխանության հետ հույսեր ես չեմ կապում»։

Արծրուն Պեպանյանն ասում է՝ ամեն 3 քաղաքացուց 2-ը այդ իշխանությանը չի ընտրել, չի ճանաչում, իսկ այս 2 տարվա ընթացքում իշխանությանը քվե տվածների մի ստվար զանգվածը հասցրել է հիասթափվել, այլապես Փաշինյանը, ինչպես մեր զրուցակիցը նշեց, սարեր-ձորեր չէր ընկնի, մարդկանց չէր վատաբանի «այո»-ի համար։
«Ժողովուրդը պետք է գար, խնդրեր, ասեր՝ պարոն վարչապետ, մենք այդ Սահմանադրությունը չենք ուզում, էդպես են չէ՞ ասում, որ ժողովրդի պահանջն է, բայց եթե նա սարեր- ձորեր է ընկնում, նշանակում է, որ լուրջ անհանգստություն ունի»։

Նշենք, որ թավշյա հեղափոխությանը հաջորդած արտահերթ ընտրություններին պաշտոնական տվյալներով, 2 մլն 592 հազար 479 ընտրողներից քվեարկությանը մասնակցել է 1 միլիոն 260 հազար 840 քաղաքացի կամ 48,63 տոկոսը, որից իշխանության օգտին քվեարկել է 70,42 %-ը։ Իսկ իշխանությանը սահմանադրական փոփոխությունները հանրաքվեով անցկացնելու համար 650 հազար կողմ ձայն է հարկավոր։

Քաղաքագետի կարծիքով, Նիկոլ Փաշինյանի հետ հանդիպումների գնացող քաղաքացիների մեծամասնությունն անգամ չգիտի, թե ինչին պետք է «այո» ասի։

«Ես միշտ ասել եմ՝ այս երկրում հանրաքվե չի կարելի անցկացնել, ընտրություն չի կարելի անցկացնել։ Այստեղ բուժման կուրս պետք է իրականացվի, քաղաքական գիտակցության մակարդակը պետք է բարձրացվի։ Պատմականորեն այդպես է ստացվել, ժողովուրդը մեղավոր չէ»,-նշում է Արծրուն Պեպանյանը՝ շեշտելով, որ իրավիճակից օգտվելու եւ ինչ-ինչ անձնական հարցեր լուծելու նպատակով ժողովրդի «խելքն ուտելու» փոխարեն, պետության ղեկավարի պարտականությունը պետք է լիներ նրա քաղաքական գիտակցության մակարդակը բարձրացնելը։

Պեպանյանը պետության դեմ հանցագործություն է համարում Նիկոլ Փաշինյանի հայտարարությունը, թե Սահմանադրական դատարանը «քոչարյանասերժական ժառանգության վերջին մնացորդն է»։ Նրա համոզմամբ, այսօրինակ հայտարարությունները Նիկոլ Փաշինյանն անում է լյումպենի համար, բայց բոլոր գիտակից մարդիկ հասկանում են , որ ՍԴ-ն պետք է լինի անկախ։

«Հիմա, հաջորդ իշխանությունը պետք գա եւ իր նշանակած ՍԴ-ին ասի՝ նիկոլակա՞ն, ամեն մի իշխանություն անընդհատ պետք է իրե՞նը դնի։ Սա արդեն հանցագործություն է պետության դեմ»,-ասում է Պեպանյանը։

Քաղաքագետը վստահ է՝ իշխանությունն իրականությունը չի հասկանում, հակառակ դեպքում չէր գնա այս հանրաքվեին. «Կհավաքեր երկրի խելոքներին, կասեր՝ ի՞նչ անենք, ժողովուրդ ջան, 100 տարի պետություն ենք ստեղծում ու բառի բուն իմաստով պայթում ենք։ Ինչո՞ւ է այդքան անհանգիստ, ՍԴ-ն մի վիշապ է, որ խանգարո՞ւմ է երկրի զարգացմանը։ Այս հարցը մտածելու տեղիք չի՞ տալիս, թե ինչու է այդքան անհանգիստ։ Ուրեմն ինչ-որ բան կա տակը, որ չի ասում»։

Եզրափակելով, Արծրուն Պեպանյանն արձանագրում է, որ Նիկոլ Փաշինյանը երբեք չի բարձրացրել այն հարցը, թե ինչու օրինակ Հայաստանի Առաջին Հանրապետությունը տապալվեց, թե ինչու էր Երկրորդ Հանրապետության վերջին երկիրն արժեհամակարգի տեսանկյունից գլխիվայր շրջված , թե ինչպես ստացվեց, որ գերհզոր ՀՀՇ-ն տապալվեց, ինչու 1998 թվականին իշխանության եկածները դատապարտեցին Տեր-Պետրոսյանին, բայց չկարողացան արդար ընտրություններ ապահովել։

«Այս կարգի հարցերը իրեն երբեւէ չեն զբաղեցրել, իսկ եթե դու այդ հարցերի պատասխանները չունես, ուզում է 105 տոկոս քվե ունենաս, երկիրը վերափոխել չես կարող»,-նկատեց Արծրուն Պեպանյանը։

Աղբյուր` Փաստինֆո