Փաստ ինֆո

ՀՀ վարչապետ Նիկոլ Փաշինյանը հայտնել է, որ ապրիլի 5-ի հանրաքվեից հետո, երբ քաղաքացիները «այո» կասեն, կսկսվի նոր ու լեգիտիմ Սահմանադրության ընդունման պրոցես։

«Այս պրոցեսը դե ֆակտո կլինի գործող Սահմանադրության վերախմբագրված տարբերակը, այսինքն մենք կբարելավենք դա։ Պայմանավորվում ենք, որ կառավարման համակարգի փոփոխություն տեղի չի ունենա, որպեսզի չընկալվի, թե ես էլ եկա ու Սահմանադրությունը փոխում եմ, որ վարչապետ չլինեմ, նախագահ լինեմ և այլն»,-այս մասին այսօր Սյունիքի մարզում «այո»-ի քարոզարշավի ժամանակ ասաց Փաշինյանը։

Նա կարևորեց, որ Հայաստանում լինի Սահմանադրություն որն իսկապես կքվեարկվի ու կընդունվի ժողովրդի ազատ կամարտահայտմամբ։

«Սահմանադրական փոփոխությունների հանձնաժողով արդեն իսկ ձևավորված է, և մենք կարող ենք հանգիստ պայմաններում ունենալ Սահմանադրության բարեփոխված, համաձայնեցված տեքստ, իհարկե որոշ նախապայմաններով»,-նշեց Փաշինյանը։

Նա ընդգծեց՝ չի կարծում, թե երկու տարին մեկ երկրի կառավարման համակարգը փոխելը լավ մոտեցում է, սակայն խմբագրական բնույթի փոփոխություններ պետք են։

«Մեկ-երկու տարուց, գուցե հաջորդ խորհրդարանական ընտրություններին զուգահեռ, կամ եթե պարզվի, որ ժողովուրդը պահանջ ունի դա ավելի շուտ անել, դա կդնենք համաժողովրդական քվեարկության ու կփորձենք ունենալ մի Սահմանադրություն, որը հաստատված է ժողովրդի լեգիտիմ քվեով»,-ասաց վարչապետն ու ավելացրեց՝ ասում է «փորձենք», քանի որ ժողովուրդն ինքը պետք է որոշի։

Նրա խոսքով, այս ամենը պետք է անել Սահմանադրական դատարանի հետ կապված փոփոխություններով, քանի որ ՍԴ-ն այն «պահապանն է», որը դիպուկահար հրացանները ձեռքին կանգնած է, որպեսզի ժողովրդավարությանը որևէ բա չսպառնա. «Այսօր խնդիրը հետևյալն է, որ մենք՝ բոլորս, չենք կարող վստահել տանիքներին տեղակայված դիպուկահարներին, որովհետև նրանք ոչ թե բոլորիս արժեքների կրողն են, այլ երկու տարիներ իրենց գործունեությամբ ցույց են տվել, որ հակառակը՝ ամեն ինչ արել են, որ ժողովրդի իշխանությունը չհաստատվի»։

Փաշինյանն ընդգծեց՝ իրենց իշխանությանը խամաճիկային դատարան պետք չէ, բայց նաև չեն կարող հանդուրժել ուրիշի ձեռքում գտնվող խամաճիկային դատարանը։

«Այո, այսօրվա ՍԴ-ն նախորդ իշխանության ձեռքում գտնվող գործիք է,դա ական է, դրված մեր երկրի քաղաքացիների, իշխանության հիմքում, դա ական է, դրված մեր պետության, ժողովրդավարության, մարդու իրավունքների, քաղաքացիների ազատության հիմքում։ Եվ մենք պետք է ականազերծենք այն»,-շեշտեց Փաշինյանն ու խոստացավ՝ չստեղծել խամաճիկային դատարան։

Նա կարևորեց, որ Դատական օրենսգիրքն ընդունելուց հետո ՍԴ դատավորների թեկնածուները կոռուպցիայի կանխարգելման հանձնաժողովում անցնելու են բարեվարքության ստուգում և պարզ է դառնալու, արդյոք նրանց կյանքում կա ինչ-որ բան, որ կարող է խանգարել օբյեկտիվ լինել. «Այդ բարեվարքության կանոնները չեն անցնի նաև այն թեկնածուները, որոնք պարզվի, որ կաշկանդված են թեկուզ այսօրվա իշխանության հետ կապերով։

Փաշինյանն իր ելույթն ավարտեց ՍԴ ներկայիս ղեկավար Հրայր Թովմասյանի խոսքերով. «Վերջերս նա իր հարցազրույցներից մեկում ասել է, որ եթե մի ՍԴ պիտի փաթեթավորի իշխանությունների որոշումները, ուրեմն այն աղետ է երկրի գլխին։ Բա մենք լրիվ համաձայն ենք դրա հետ, մենք ասում ենք, որ այս ՍԴ-ն , որն իր գոյության ողջ ընթացքում զբաղվել է միայն իշխանությունների որոշումները փաթեթավորելով, այդ ՍԴ-ն պետք է գնա։ Եվ ես բոլորիդ աչքերի մեջ նայելով ասում եմ, որ իմ կողմից դավաճանություն կլինի, եթե փորձեմ ՍԴ-ի նկատմամբ հսկողություն սահմանել և այն դարձնել կառավարության խամաճիկ։

Դա կլինի դավաճանություն, և ես ձեզնից յուրաքանչյուրին տալիս եմ իրավունք նման իրադարձությունների զարգացման դեպքում ինձնից պատասխան պահանջել ամենախիստ միջոցներով։ Ես վստահ եմ,ո ր ոչ մի միլիմետր չեմ շեղվի,որովհետև ինձ համար չկա ավլեի կարևոր ու թանկ բան, քան դուք և ձեր վստահությունը»։

Հեղինակ՝ Սոնա Գեւորգյան

Աղբյուր` Փաստինֆո