Փաստ ինֆո

ՀՀ վարչապետ Նիկոլ Փաշինյանն այսօր Մեղրիում «այո»-ի քարոզարշավի ժամանակ արձանագրել է, որ հեղափոխությունից հետո բոլոր ընտրություններն արդար են եղել և նույնիսկ մեկ գյուղապետ չկա, որի ընտրությունը եղել է պարտադրաբար։ Նա անդրադարձել է խոսակցություններին, թե իշխանություններն անգամ պատրաստ են կեղծել հանրաքվեի արդյունքները։

«Ախր դուք ինչ եք հասկանում ընդհանրապես։ Հիշու՞մ եք Սերժ Սարգսյանի հետ բանավեճի ժամանակ ասում էի՝ Դուք չեք հասկանում Հայաստանում ինչ է կատարվում, ինքն էլ ծիծաղում էր։ Հիմա այդ բոլոր մարդիկ չեն հասկանում Հայաստանում ինչ է կատարվում։ Հայաստանում ընտրություններ կեղծելու էջը փակված է։ Երկու ձեռքերս կկտրեմ, թույլ չեմ տա արժանապատիվ, հպարտ քաղաքացու ձայնը որևէ մեկը կեղծի, և այդ կեղծողի ձեռքերն առավել ևս կկտրեմ»,-հանրահավաքի ժամանակ ասաց Փաշինյանը։

Նա ընդգծեց՝ այն պահին երբ ժողովուրդը, Հայաստանի հպարտ քաղաքացի կորոշի, որ ինքը պետք է ուրիշ գործով զբաղվի, նույն պահին կլքի պաշտոնն ու այլ գործով կզբաղվի։

«Ես առաջին օրվանից ասել եմ, դատական գործերին չեմ միջամտելու, դատավորներն ինչ ուզում են թող անեն, դրանից հետո ի՞նչ է տեղի ունենում, ասում են դե լավ է, որ երկրի ղեկավարը չի ուզում «կոնտրոլ» անի համակարգը, եկեք մենք «կոնտրոլ» անենք դատական համակարգը։ Սրանց խելքին աշեցեք»,-խոսելով ՍԴ-ի մասին ասաց Փաշինյանը։

Շարունակելով խոսքը, վարչապետն ասաց, որ այս հանրաքվեով պետք է կտրվեն անտեսանելի ձեռքերը նույնպես պետք է կտրվեն. «Դրանց բոլորի շոշափուկները, իրենց կեղտոտ ձեռքերով, որ ուզում են Հայաստանը հետ գլորեն դեպի կոռուպցիայի, հուսահատության, «բեսպրեդելի», օլիգարխիայի, հաստագլուխների ժամանակներ, այդ անտեսանելի ձեռքերը մենք Սահմանադրական հանրաքվեով պետք է կտրենք»։

Աղբյուր` Փաստինֆո