Փաստ ինֆո

Գյումրիում ծեծի ենթարկված 13-ամյա երեխայի խնամակալությամբ կա հետաքրքրվող անձ։ Գյումրու խնամակալության և հոգաբարձության հանձնաժողովը դիմում է ստացել Երևանի բնակիչ Հասմիկ Մանասյանից, ով պատրաստակամություն է հայտնել ստանձնել երեխայի խնամակալությունը։

«Փաստինֆո»-ի հետ զրույցում հանձնաժողովի նախագահ Էդուարդ Բաղրամյանն ասաց՝ հարցի քննարկումը դեռևս կասեցրել են։ Հանձնաժողովի այսօրվա նիստի օրակարգում քննարկել են երկու հարց. Երեխային որպես երկկողմանի ծնողազուրկ գրանցելը և առայժմ խնամակալության հարցը չքննարկելը.

«Ճիշտն ասած առայժմ հետաձգել ենք հարցի քննարկումը, որովհետև նոր-նոր ենք գրանցել որպես առանց ծնողական խնամքի մնացած երեխա։ Այնպես չէ, որ ով ցանկություն ներկայացրեց, մենք անմիջապես ճանաչելու ենք խնամակալ։ Դրա համար կազմակերպվում է համալիր ուսումնասիրություն։ Կարևոր հարց կա՝ արդյոք երեխան մնալու է Գյումրիում, թե գնալու է Երևան։ Դեռևս վերականգնման խնդիրներ կան, եթե ամեն ինչ լավ անցնի, հնարավոր է վերականգնողական պրոցեդուրաներ անցնի երեխան, ինչի համար պարզ է՝ ցանկալի կլինի խնամակալը Երևանից լինի»,-ասաց Էդուարդ Բաղրամյանը՝ ընդգծելով, որ խնամակալի ընտրության հարցը կախված է նրանից, թե հետագայում ինչ ընթացք կստանա այս ամենը։

«Այժմ խնդրի քննարկումը ժամանակավորապես կասեցվել է, սակայն ժամանակի ընթացքում կհետաքրքրվեն խնամակալ դառնալու պատրաստակամություն հայտնած անձով։ Եթե որոշում կայացվի՝ երեխան Երևան է գնալու, ուրեմն անպայման կայցելենք Երևան, կծանոթանանք այդ անձի հետ, կտեսնենք՝ ինչ պայմաններում, որտեղ է ապրում, ինչ հնարավորություններ ունի»,- նշեց մեր զրուցակիցը։

Էդուարդ Բաղրամյանը հավելեց՝ խոսքը գնում է նաև աղջկա եղբոր մասին, ում 18 տարին լրանալու է սեպտեմբերին։ Էդուարդ Բաղրամյանի տեղեկություններով նա պետք է այսօր Գյումրի գա, քանի որ վաղը մոր հուղարկավորությունն է լինելու. «Կարող է պատահի՝ հետ չգնա, ոչ ոք չի կարող ասել։ Միգուցե հետը խոսենք ու համաձայնվի 18-ից հետո խնամակալ լինել։ Կարող է նաև ինքն ասի, որ մինչև սեպտեմբեր յոլա տարեք կամ նշանակեք ժամանակավոր մեկին, ով կզբաղվի մինչև իր 18-ը լրանա»,-հավելեց Էդուարդ Բաղրամյանը։

Հարցին՝ արդյոք հարազատները չե՞ն հետաքրքրվել երեխայով, Էդուարդ Բաղրամյանը նկատեց՝ հորաքույրներից մեկն ապրում է Գյումրիում, իսկ մյուսը՝ Ռուսաստանում և երկուսն էլ հայտնել են՝ ընդհանրապես չեն ուզում տեսնել։

Հիշեցնենք, որ մարտի 5-ին Գյումրիում դաժան ծեծի էին ենթարկվել մայրն ու նրա անչափահաս դուստրը. կինը մահացել է, իսկ փոքրիկ աղջնակը ծայրահեղ ծանր վիճակում՝ մարմնական բազում վնասվածքներով տեղափոխվել է «Սուրբ Աստվածամայր» ԲԿ։

Երեխան այսօր գիտակցության է եկել և կարողանում է որոշակի բառեր արտասանել։ «Սուրբ Աստվածամայր» ԲԿ մամուլի խոսնակ Գևորգ Դերձյանը հայտնում է՝ չնայած սրան երեխայի վիճակը շարունակում է մնալ ծանր՝ վնասվածքները շատ են։

Նշենք, որ դեպքի առթիվ հարուցվել է քրեական գործ ՀՀ ՔՕ 112-րդ հոդվածի 2-րդ մասի 1-ին և 14-րդ կետերով։ Հանցագործությունը կատարելու կասկածանքով ձերբակալվել է Գյումրի քաղաքի 28-ամյա բնակիչը, ով խոստովանել է՝ ինքն է ծեծի ենթարկել 42-ամյա կնոջը և նրա դստերը։ Մեղադրյալը կալանավորվել է։

Հեղինակ՝ Հասմիկ Կոշկարյան

Աղբյուր` Փաստինֆո