Փաստ ինֆո

Փաշինյանը Փաշինյան չէր լինի, եթե հորինված՝ սահմանադրական հանրաքվեի քարոզարշավը չվերածեր ստի քարոզչության: Ինչպես եւ սպասվում էր «Այո»-ի անվան տակ իրականացվում է «Ոչ»-ի քարոզչություն՝ տարածելով գերադրական աստիճանի սուտ ու կեղծիք։ 

«Բոլոր իշխանությունները պետք է ներկայացնեն ժողովրդին, սակայն այսօր ՍԴ-ն Հայաստանի ժողովրդին չի ներկայացնում, և ես ձեզ կոչ եմ անում, որ գնաք տեղամասեր և արձանագրեք, որ տուն եք ուղարկում ընտրակեղծիքների տանիք դարձած ՍԴ-ն, դուք իրենց ազատում եք աշխատանքից և թող իրենք հասկանան, որ դուք եք այս երկրի տերը»,- այսօր Սյունիքում հայտարարել է Փաշինյանը:

Եւ ոչինչ, որ Հայաստանի Սահմանադրությամբ ժողովուրդը դատավոր ընտրելու իրավունք չունի ու երբեք էլ չի ունեցել։ Պարզապես գործ ունենք պարզ Մանիպուլյացիայի հետ։

«Սահմանադրական դատարանը ոչ ընտրությունները կազմակերպող է, ով էլ՝ վերահսկող, ուստիեւ կեղծելու հնարավորություն օբյեկտիվորեն չունենք, թե ինչու են մեր վրա բարդում, քավության նոխազ ուզում դարձել՝ իրենց հարցրեք, հերիք է հերյուրանքներ տարածել»,- հայտարարել է ՍԴ դատավոր Ֆելիքս Թոխյանը։

Հույս ունեմ, որ ժողովուրդն, այնուամենայնիվ Փաշինյանի այս անտրամաբանական պոպուլիզմին տուրք չի տալու, քանզի ինչ-ինչ, բայց ժողովուրդը տարիներ շարունակ հետընտրական գործընթացներում վիճարկումների, ընտրակեղծիքների հետ կապված բողոքարկումների, վերահաշվարկների և այլնի համար առնչություն է ունեցել ոչ թե ՍԴ-ի, այլ՝ Կենտրոնական ընտրական հանձնաժողովի հետ, որին, ի դեպ, ընդդիմադիր Փաշինյանն ահավոր ձաղկում էր, իսկ վարչապետ Փաշինյանն այսօր խնայում ու փայփայում է: Տեսնես, ինչի՞ համար: Թերևս, հասկանում է, որ 650 հազար ձայն առանց Մուկուչյանի օգնության, ուղղակի անհնար է ապահովել:

Ըստ այդմ, ոչ ոք նրանց ձեռքը չի բռնում՝ քրեական գործեր հարուցելու տարիներ շարունակ տեղի ունեցած ընտրակեղծիքների և ընտրակեղծարարների դեմ՝ պատժելով նրանց խստագույն կերպով: Ո՞վ է խանգարում Նիկոլ Փաշինյանին այս հարցին ընթացք տալ: Սահմանադրական դատարա՞նը:

Իհարկե ոչ: Պարզապես, ամբիոններից բարձր գոռալը ոչ մի պատասխանատվություն չի ենթադրում։ Ճիշտ է՝ արդարադատության իրականացմանը խոչընդոտելը, դատավորին վիրավորներն ու զրպարտելը հանցագործություն է՝ նախատեսված ՀՀ քրեական օրենսգրքի 332, 343 եւ 344 հոդվածներով, քանի որ Նիկոլ Փաշինյանն այս հանրաքվեով փաստացի զրկում է ՍԴ-ին՝ Սահմանադրական արդարադատություն իրականացնելուց ու 7 դատավորին զրպարտում՝ մեղադրելով ընտրություններ կեղծելու մեջ։ Իրավապահ մարմինները, ի մասնավորի դատախազությունն, իհարկե, չի տեսնում գործադրի կողմից դատական իշխանության նկատմամբ ակնհայտ ոտնձգությունները՝ նպաստելով զրպարտությունների տարածմանը։

Իսկ որ Փաշինյանի հայտարարությունները զրպարտություն են՝ վկայում է քրեական գործերի բացակայությունը՝ նկատենք՝ իշխանափոխությունից անցել է երկու տարի, բայց առ այսօր գեթ մեկ քրեական գործ չի հարուցվել նախորդ տարիներին տեղի ունեցած ընտրությունների, հանրաքվեների արդյունքները կեղծելու դեպքերի առթիվ։ Սա կարող է ունենալ երկու բացատրություն՝ կամ չկան հիմքեր, ինչը ի հայտ կգա քննությամբ ու կապացուցի Փաշինյանի խոսքերի սնանկությունը կամ էլ նոր իշխանությունները դառնում են նախկինում կատարված կեղծիքների հովանավորը։ Երկու դեպքում էլ գործ ունենք պարզ մանիպուլյացիաների հետ։

Հիմա, ինչու՞ է նա ժողովրդին ուզում դարձնել քավության նոխազ: Ի վերջո, ժողովուրդն ինքն իրեն հարց պիտի տա՝ ինքը ե՞րբ և ի՞նչ առնչություն է ունեցել Սահմանադրական դատարանի հետ: Չկա նման առնչություն:

Այ, Փաշինյանն ու իր թիմն է, որ ուզում են ՍԴ-ն առնչություն ունենա և օրինականացնի միասեռ ամուսնությունները, ստամբուլյան կոնվենցիան՝ իր բազմաթիվ տխուր հետևանքներով հանդերձ:

Հեղինակ՝ Մարինե Մինասյան

Աղբյուր` Փաստինֆո