Փաստ ինֆո

Գյումրիում ընդդեմ կանանց նկատմամբ իրականացվող բռնության քայլերթի մասնակիցներն այժմ գտնվում են այն տան առջև, որտեղ օրերս սպանվել է 43-ամյա կինը։

Կին ակտիվիստերը նշում են՝ խաղաղ ակցիայով ցանկանում են ցույց տալ, որ գյումրեցիները դեմ են բռնությանը և ոչ մի արդարացում չկա, երբ կնոջը ծեծում են կամ սպանում. «Ինչքան ուզում են բռնարարին արդարացնել, դա ամբողջովին դատապարտելի է։ Այս տանը, այս դարպասների հետևում տեղի ունեցավ այդ սարսափելի ոճրագործությունը և ծեծն անչափահաս երեխայի հանդեպ, որովհետև հասարակությունն անտարբեր էր։ Եթե մեկ կամ երկու անգամ բռնության նկատմամբ չլռեր, այս դեպքը երբեք տեղի չէր ունենա»,-նշեց ակտիվիստներից մեկը։

«Կինը՝ կնոջը թիկունք» վանկարկելով ակտիվիստները ցանկանում են բարձրաձայնել կանանց իրավունքները։
Հիշեցնենք, որ մարտի 5-ին Գյումրիում դաժան ծեծի էին ենթարկվել մայրն ու նրա անչափահաս դուստրը. կինը մահացել է, իսկ փոքրիկ աղջնակը ծայրահեղ ծանր վիճակում՝ մարմնական բազում վնասվածքներով տեղափոխվել «Սուրբ Աստվածամայր» ԲԿ։

Ծեծի ենթարկված 13-ամյա աղջիկն այսօր առավոտյան արդեն գիտակցության թեթև ակտիվություն է ցուցաբերել, կոնտակտային որոշ բառեր արտաբերել։ Վիճակը շարունակում է մնալ ծանր։

Նշենք, որ դեպքի առթիվ հարուցվել է քրեական գործ ՀՀ ՔՕ 112-րդ հոդվածի 2-րդ մասի 1-ին և 14-րդ կետերով։ Հանցագործությունը կատարելու կասկածանքով ձերբակալվել է Գյումրի քաղաքի 28-ամյա բնակիչը , ով խոստովանել է՝ ինքն է ծեծի ենթարկել 42-ամյա կնոջը և նրա դստերը։

Աղբյուր` Փաստինֆո