Փաստ ինֆո

«Կանայք սպանվում են ձեր լռության պատճառով», «Ոչ բռնությանը», «Հերիք է՝ սպանեք մեզ»։ Այս վանկարկումներով և պաստառներով Գյումրիում քայլերթի են դուրս եկել մի խումբ կին ակտիվիստներ՝ ընդդեմ կանանց նկատմամբ իրականացվող բռնության։

«Բոլորս հավաքվել ենք, որպեսզի մերժենք բռնությունը, մերժենք լռությունն ու հասարակության կողմից անտարբերությունը։ Նաև ուզում ենք հասարակությանն իրազեկել, որ կանայք մեղավոր չեն ու չպետք է լռեն։ Ամեն ինչ անելու ենք, որ կնասպանության, բռնության դեպքերը նվազեն։ Մարինեի՝ 43-ամյա կնոջ մահվան դեպքը որակվել է անզգուշությամբ մահ հասցնել, հետևաբար մենք հետամուտ ենք լինելու, որպեսզի հնարավորինս ծանր պատիժ լինի»,-լրագրողների հետ զրույցում այս մասին ասաց ակտիվիստ Կարինե Դավթյանը՝ ընդգծելով, որ բարձրաձայնելու են կանանց իրավունքները։
Քայլերթը կազմակերպել է «Ընդդեմ կանանց նկատմամբ բռնության» կոալիցիան, որտեղ ներառված են կանանց իրավունքների պաշտպանությանմբ զբաղվող մի քանի կազմակերպություններ։

Հիշեցնենք, որ մարտի 5-ին Գյումրիում դաժան ծեծի էին ենթարկվել մայրն ու նրա անչափահաս դուստրը. կինը մահացել է, իսկ փոքրիկ աղջնակը ծայրահեղ ծանր վիճակում՝ մարմնական բազում վնասվածքներով տեղափոխվել «Սուրբ Աստվածամայր» ԲԿ։

Ծեծի ենթարկված 13-ամյա աղջիկն այսօր առավոտյան արդեն գիտակցության թեթև ակտիվություն է ցուցաբերել, կոնտակտային որոշ բառեր արտաբերել: Այս մասին հայտնում է «Սուրբ Աստվածամայր» ԲԿ մամուլի խոսնակ Գևորգ Դերձյանը։

«Երեկվանից էլ սկսել է շնչել ինքնուրույն, հանվել է արհեստական շնչառության սարքը։ Վիճակը շարունակում է մնալ ծանր։ «Սուրբ Աստվածամայր» ԲԿ-ի բժիշկները շարունակում են պայքարել աղջկա կյանքի համար»,-նշել է Գևորգ Դերձյանը։

Նշենք, որ դեպքի առթիվ հարուցվել է քրեական գործ ՀՀ ՔՕ 112-րդ հոդվածի 2-րդ մասի 1-ին և 14-րդ կետերով։ Հանցագործությունը կատարելու կասկածանքով ձերբակալվել է Գյումրի քաղաքի 28-ամյա բնակիչը , ով խոստովանել է՝ ինքն է ծեծի ենթարկել 42-ամյա կնոջը և նրա դստերը։

Աղբյուր` Փաստինֆո