Փաստ ինֆո

Ղարաբաղի հարցը ռազմական ճանապարհով չի լուծվել ու չի լուծվելու։ Ամեն ինչ անելու ենք, որպեսզի Ղարաբաղի հարցով մեզ թյուրիմացության մեջ չգցեն։ Այս մասին երեկ՝ մարտի 8-ին, Իվանյան գյուղի ընտրողների հետ հանդիպման ժամանակ հայտարարեց Արցախի նախագահի թեկնածու Վիտալի Բալասանյանը։

«Տարածքների առնչությամբ պատմականը դեռ մի կողմ թողնենք, բայց Ադրբեջանը կամ դրանց մասին խոսող որեւէ երկիր, եթե դույզն- ինչ կասկած ունենար, որ իրավական առումով հողի մի կտոր թեկուզ պատկանում է Ադրբեջանին, հիմա հազար անգամ մեզ դատի էին տվել, էլ ինչի էր կռվում»,-նշեց Վիտալի Բալասանյանը։

Վերջինս նկատեց՝ հակառակորդի կրակակետերը լռեցվել են և լռեցվելու են. «Եթե Ադրբեջանի քաղաքական կամ ռազմական իշխանությունը շարունակի այդ լկտիությունը, մի հատ էլ ենք լռեցնելու, որևէ խնդիր չկա»,-ընդգծեց Վիտալի Բալասանյանը։

Իվանյան գյուղի ընտրողների հետ հանդիպմանը անդրադառնալով կրթության ոլորտին՝ Վիտալի Բալասանյանը նկատեց՝ երբ կրթության վիճակը ծայրահեղ ծանր է, չի կարելի վաղն ասել՝ բուհերն անվճար են լինելու. «Շուշիի տեխնոլոգիական համալսարանում իբր թե սովորում է 1275 ուսանող, որի հոգաբարձուների խորհրդի նախագահն Արայիկ Հարությունյանն է։ Առկա 600 հոգի, հեռակա 675 հոգի։ 200-ից ավել դասախոսական կազմ, պատկերացնու՞մ եք երեք ուսանողին մեկ դասախոս է։ Հեռական ընդհանրապես համալսարանում չի երևում, միայն զաչոտի օրը։ Հարցում՝ հետադիմության համար քա՞նի ուսանող է հեռացվել՝ 0, բայց ընդհանուր քա՞նի ուսանող է հեռացվել՝ 27, որովհետև ուսման վարձը չեն տվել»,-նշեց Վիտալի Բալասանյանը՝ հավելելով, որ երբ նայում են այդ 27 ուսանողի հաճախությունները, տեսնում են՝ նրանք բացակա չունեն, ավելին՝ ամենալավ սովորողներն են։

Վիտալի Բալասանյանն ասաց, եթե ինքը լինի նախագահ և աշխարհի գումարն էլ այստեղ լինի, այսպիսի բուհն անվճար չի լինի. «Անվճար կլինի նրանց համար, ովքեր գերազանցիկ կլինեն»,-նշեց Վիտալի Բալասանյանը։

Աղբյուր` Փաստինֆո