Փաստ ինֆո

Երկու օր է Եղեգնաձորում դաժանաբար ծեծված փոխգնդապետ Արա Մխիթարյանի հարազատներն ու բարեկամները բողոքի գործողությունների են դիմում` պահանջելով արդարություն։ Նրանց վրդովեցրել է այն , որ գործով մեղադրյալի խափանման միջոց կալանավորումը փոխվել է։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում։ Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեեւ մամուլի տեղեկություններով`փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ մարզպետը, որը հենց այս աղմուկի հետեւանքով հայտարարեց լիազորությունները վայր դնելու մասին։ Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները։ Արդեն 6 ամիս է, ինչ փոխգնդապետը գտնվում է կոմայի մեջ:

Դաժան ծեծի ենթարկված զինվորականի հարազատները վարչապետ Նիկոլ Փաշինյանի եւ պաշտպանության նախարար Դավիթ Տոնոյանին ժամանակ են տվել։ «Եթե էդ ճիվաղ մարզպետին, մնացած հինգ հոգու հետ չկալանավորվեն, Եղեգնաձորի ոստիկանապետն ու քննչականի պետը չկանչվեն պատասխանատվության, ինձնից չնեղանաք», -հայտարարել էր փոխգնդապետի հայրը` Սամվել Մխիթարյանը։

Ուշագրավ է, որ վարչապետ Նիկոլ Փաշինյանը գոնե հրապարակային չի արձագանքել եւ չի անդրադարձել խնդրին, մինչդեռ վարչապետն ամենատարբեր խնդիրների շուրջ սիրում է «զրուցել քաղաքացու» հետ։

Քաղտեխնոլոգ Վիգեն Հակոբյանը կարծում է՝ վարչապետը հրապարակային անդրադառնում է այն խնդիրներին, որոնք ավելի գլոբալ բնույթի են եւ կարող են հանրային դժգոհության լայն ալիք ստեղծել եւ, այսպես ասած, վտանգ ու ռիսկ կա, որ կարող են զանգվածային բողոքի առիթ դառնալ։

«Վարչապետն անդրադառնում է խնդիրներին այն ժամանակ, երբ բողոքավոր բավականին լուրջ զանգվածներ հայտնվում են կառավարության դռան դեմը կամ ճանապարհներ են փակում։ Ես նկատի ունեմ այն պրոբլեմները, որոնք կարող են ապակայունացնել իրավիճակը եւ դիսկոմֆորտ առաջացնել իշխանության համար»,-կարծում է Վիգեն Հակոբյանը։

Քաղտեխնոլոգի խոսքով, ընդհանրապես դա բնորոշ է բոլոր իշխանություններին։ Օրինակ, նախկինում էլ իշխանությունները մշտապես ընդդիմությանն առաջարկում էին հանրահավաքներն անցկացնել Հրազդան մարզադաշտի մոտ, միայն թե հանրահավաքները տեղի չունենային Մատենադարանի կամ Ազատության հրապարակում, որովհետեւ այնտեղ մարդիկ կամա թե ակամա ավելի շատ էին հավաքվում։

«Այսինքն, քանի դեռ խնդիրը լոկալ բնույթի է, մինչեւ ապակայունացման ռիսկի հետ կապված խնդիր չի առաջանում, վախ չի առաջանում, որ դա կարող է էլ ավելի ռեզոնանսային բնույթ կրել, իշխանությունը կարծես թե չի նկատում խնդիրը»

Քաղտեխնոլոգը չի բացառում, որ ծեծի ենթարկված սպայի գործով արդարադատության պահանջը գուցե սպայական խավի շրջանում ավելի ընդգրկուն դառնա, բայց Վիգեն Հակոբյանի խոսքով, այդ դրսեւորումը իշխանությունը դեռ չի տեսնում եւ անգամ , եթե գիտակցում է, որ կարող է նման ռիսկ լինել, չի շոշափում խնդիրը։

«Այսօրվա իշխանության մոտ նաեւ այսպիսի մի բան է նկատվում՝ այն, ինչ ինքը չի կարողանում շոշափել եւ մոտիկից տեսնել, մտածում է, որ չկա կամ ջայլամի քաղաքականություն է վարում։ Այ, երբ դա տեսում, շոշափում եւ իրենց անմիջականորեն շատ մոտիկ լսում է` տեսնում ենք, որ ռեակցիա է լինում, ինչպես եղավ մսավաճառների կամ տաքսու վարորդների դեպքում»,-ասաց Վիգեն Հակոբյանը՝ նկատելով, որ օրինակ, բալային համակարգի խնդիրների հետ կապված Փաշինյանի ուղիղ եթերը հենց այդ արձագանքն է։

Վիգեն Հակոբյանն ասում է՝ Հայաստանում իշխանափոխությունից հետո համակարգերը չեն գործում եւ խնդիրները կարող են լուծում ստանալ, երբ հասնում են Փաշինյանի աչքին կամ ականջին, ինչը, իհարկե, չի նշանակում, որ դրանք բոլորը ուծվում են, բայց ըստ քաղտեխնոլոգի, իրավիճակն այնպիսին է, որ մարդիկ չեն հավատում, այլ մարմիններ կամ անձինք կարող են իչ-որ խնդիր լուծել։

«Դա է օբյեկտիվ իրողությունը, դա աննորմալ բան է, բայց դա է փաստը»,-նշում է Վիգեն Հակոբյանը՝ շեշտելով, որ իրավիճակի մեղավորը հենց վարչապետն է, որը սեփական թիմի նկատմամբ իր առավելությունն ընդգծելու համար բոլոր խնդիրներն իր վրա է վերցրել եւ հիմա հասկանում է, որ միայնակ դրանք չի կարող լուծել։

Վիգեն Հակոբյանը հենց այս հանգամանքով է պայմանավորում ժամանակ առ ժամանակ վարչապետի հնչեցրած հայտարարությունները, թե պետական համակարգում սաբոտաժնիկներ կան։ Ըստ քաղտեխնոլոգի, այսկերպ Փաշինյանը մեղավորներ է փնտրում,մինչդեռ Հայաստանում իշխանափոխությունից հետո ինչպես վրաչապետն է սիրում ասել, «հիբրիդային» համակարգ է առաջացել, երբ հինը փորձ է արվում քանդել, իսկ նորը չի ստեղծվում։

Աղբյուր` Փաստինֆո