Փաստ ինֆո

Պաշտպանության նախարարության կարիքների համար հայտարարվող որոշ մրցույթներ, պարզվում է, այնքան էլ հարթ չեն ընթանում։

Նախորդ տարի մեծ աղմուկ հանած «Օրսիս»-ՊՆ վեճը, որի հետեւանքով մի քանի միլիոն դոլարի չափով ռազմատեխնիկայի մատակարարումների տենդերը տապալվել էր, միակը չէ, որ խնդիրներ է առաջացրել։

2019 թվականի մայիսին զինվորական ճտքավոր կոշիկներ ձեռք բերելու համար ՀՀ Պն-ի հրատապ մրցույթը, պարզվում է, կռվախնձոր է դարձել տենդերին դիմած ընկերությունների համար։ Մրցույթին մի քանի կազմակերպություն է մասնակցել, այդ թվում «ԳԱՌՈՒ ԳՐՈՒՊ» ՍՊԸ-ն եւ Արցախ կարի-կոշիկի արտադրական միավորում» ՓԲԸ-ն։ Այս ընկերությունների միջեւ մրցույթի արդյունքների շուրջ վեճը դատարան է հասել։

Ինչպես «Փաստինֆո»-ին փոխանցեց «ԳԱՌՈՒ ԳՐՈՒՊ» ՍՊԸ-ի շահերի ներկայացուցիչ փաստաբան Տիգրան Գրիգորյանը, որոշակի խմբաքանակի ապահովման մրցույթին հաղթել է տվյալ ընկերությունը։ Մյուս կազմակերխությունը՝ «Արցախ կարի-կոշիկի արտադրական միավորում» ՓԲԸ-ն, որը նախկինում բանակի ճտքավոր կոշիկներ է մատակարարել, մրցույթի արդյունքները նախ բողոքարկել է գնումների հետ կապված բողոքները քննող մարմին, ապա՝ դատարան ։

Փաստաբանի փոխանցմամբ, դատարանը կիրառել է հայցի ապահովման միջոց՝ արգելանք, ինչի հետեւանքով գործընթացը որոշ ժամանակով կասեցվել է եւ «ԳԱՌՈՒ ԳՐՈՒՊ» ՍՊԸ-ն չի կարողացել մատակարարումն իրականացնել։

«Պատկերացրեք, պետք է կոշիկներ, բայց քանի որ բողոքներ կան եւ կիրառվել է արգելանք, չի մատակարարվում։ Շատ լավ է, որ դատավոր Թաշչյանը ընկալեց գործի մանրամասները եւ վերացրեց արգելանքը, որ գործընթացը շարունակվի, որը բողոքարկվեց Վերաննիչ եւ ի պատիվ Վերաքննիչի, թողնվեց անփոփոխ։ Մատակարարումը գնաց, բայց այդ ընթացքում մենք դիմել էինք վարչապետին բողոքով, նկարագրել էինք գործընթացի հետ կապված մեր դիտարկումները, մեր տեսակետից՝ չարաշահումներն ու կոռուպցիոն ռիսկերը, որը հետագայում համապատասխան ցուցումով՝ ստուգում կատարելու, փոխանցվել է ՊՎԾ»,-տեղեկացրեց փաստաբանը՝ հավելելով, որ ՊՎԾ-ն ՊՆ-ում ստուգումներ է իրականացրել, որոնց արդյունքում հայտնաբերված խախտումների վերաբերյալ նյութերն ուղարկվել են ՀՀ քննչական կոմիտե՝ իրավական գնահատականներ տալու։

Տիգրան Գրիգորյանն ասաց, որ այդ նյութերին իրենք ծանոթ չեն եւ չգիտեն՝ արդյո՞ք խոսքն իրենց բարձրաձայնած խախտումների մասին է, թե այլ խնդիրներ եւս հայտնաբերվել են մրցույթի հետ կապված։ «Փաստը նա է, որ նյութը փոխանցվել է Քննչական կոմիտե, կսպասենք զարգացումների։ Մեր բարձրաձայնած խնդիրն այն է, թե ինչպես է այս ամենը տարբեր ուժերի կողմից խոչընդոտվում, պրոբլեմներ ստեղծվում։ Հուսով եմ, որ սա հանգուցալուծում կունենա եւ մենք զերծ կմնանք նման արատավոր պրակտիկայից՝ նկատի ունեմ, որ որեւէ մեկի կողմից ինչ-որ մրցույթների ուղղորդում չլինի, մեկին առավելություն չտան կամ մեկին առավելություն տալու համար մյուսին արհեստական խոչընդոտներ չլինեն»։

Տիգրան Գրիգորյանը հղում անելով նախաքննական գաղտնիքին, հրաժարվեց անուններ նշել։ Միայն ասաց, որ խոսքը բարձրաստիճան պաշտոնյաների մասին է. «Պաշտոնատար անձնաց կողմից խոչընդոտներ են եղել, որի մասին մենք գրավոր բարձրաձայնել ենք եւ այդ ամենը իրավական գնահատման փուլում է գտնում, դրանից ավելին հայտնելու իրավունք ես չունեմ։ Ես ոնց հասկանում եմ, ՊՎԾ-ի ստուգումների նյութերը, տվյալ մրցույթի իրականացման ընթացքում ենթադրյալ չարաշահումների մասին՝ այդ թվում նաեւ պաշտոնատար անձանց կողմից, կգնա կմիանա ԶՔԳՎ- գործին»։

Զինված ուժերի կարիքների համար ռազմական ճտքավոր կոշիկների գնման մրցույթի հետ կապված քաղաքացիական հայցի վիճարկման գործընթացը շարունակվում է, թեեւ դատարանը վերացրել է արգելանքը։

Աղբյուր` Փաստինֆո