Փաստ ինֆո

Սահմաններին կանգնած սպան ավելի պաշտպանված է, քան՝ երկրի ներսում, որովհետև երկրի ներսում սպային կարող են ջարդել-փշրել և ասել՝ մեր դեմը խաղ չկա, ինչ ուզենք կանենք։ Այս մասին լրագրողների հետ զրույցում ասաց դաժանաբար ծեծի ենթարկված սպա Արա Մխիթարյանի հայրը։

«Ժողովուրդ, սպաների մայրեր, լավ լսեք ջարդված տղու հոր ձենը, զգույշ եղեք, ձեր երեխուն պահեք, քանի որ հիմա սպան շատ ցածր մակարդակի է իջած՝ ով ուզի, կխփի»,- ասաց Արա Մխիթարյանի հայրը։ Նշենք, որ փոխգնդապետն արդեն շուրջ 6 ամիս է, ինչ գտնվում է կոմայի մեջ։

Նրա խոսքով՝ երեկ ազատ են արձակել մի մարդու, ով 100 տոկոսով մասնակից էր եղել միջադեպին և վերջինիս ազատ են արձակել, որ խմբային չտան։

«Իմ երեխան 27 տարի, մութ ու խոնավ տարիներին, երբ ժողովուրդը հաց չուներ, իմ երեխային համոզեցի, որ գնար սովորեր ու գար հայրենիքը պաշտպաներ ու այսօր իմ երեխային էդպես ջարդել ու քցել են։ Դիմում եմ Ձեզ՝ Վերաքննիչ քրեական դատարանի դատավոր։ Ես վերջում բոլորին կանիծեմ, բոլորին, ով այս գործի հետ կապ ունի ու լավ իմացեք, տղա, ասում են մեծերը՝ տղամարդու անեծքը, մանավանդ՝ հոր, ջարդված որդու հոր, շուտ է տեղ հասնում։ Այսօր տեղ չհասնի, վաղը կհասնի։ Դիմում եմ Ձեզ՝ հալալ է քո կերած կաթին, որ դու կկարողանաս սպային ջարդողին, երևի Դուք էլ ունեք ուսադիրներ՝ որպես դատավոր։

Եթե քո որդու հետ լիներ, դու այդպես կանեիր՞, կազատե՞իր։ Արմեն Դանիելյան, դիմում եմ քեզ՝ քանի շուտ է, ուշքի արի »,- ասաց նա՝ նշելով, որ երեք նամակ ունի և, եթե մինչև երկուշաբթի իրենց պահանջը չկատարվի, նամակներից մեկը կգնա դեպի օվկիանոսից այն կողմ, մյուսները՝ ՄԻԵԴ և ԵԽ։

Նա նշեց, որ իր պահանջը չկատարելու դեպքում այլևս չի հավատա ո՛չ պետությանը, ո՛չ բանակին։

«Դու պարոն դատավոր, ուշքի արի»,- ասաց նա՝ նշելով, որ դատախազությունը պետք է բողոքարկի այդ որոշումը։

«Ես չգիտեմ դա ճիշտ է, թե ոչ։ Մինչև չլինի, չեմ հավատա։ Մինչև հիմա փափուկ բարձ են դրել գլխիս տակ»,- ասաց նա՝ հավելելով, որ թուրքի լամուկը կարող է ծեծել և հիմա ազատությունը վայելել։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում ։ Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեեւ մամուլի տեղեկություններով`փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ մարզպետը, որը հենց այս աղմուկի հետեւանքով հայտարարեց լիազորությունները վայր դնելու մասին։ Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները։

Մեղադրյալն ազատ է արձակվել 1.5 միլիոն գրավի դիմաց։

Մանրամասները՝ տեսանյութում

Աղբյուր` Փաստինֆո