Փաստ ինֆո

ՀՀ վարչապետ Նիկոլ Փաշինյանն այսօր բուկլետներ է բաժանել Լոռու մարզի Ստեփանավան քաղաքում։

Նա «այո»-ի շտաբի ղեկավար Սուրեն Պապիկյանի հետ քայլել է քաղաքի փողոցներով, քաղաքացիներից հետաքրքրվել՝ արդյոք գնալու են հանրաքվեին և ինչպես են քվեարկելու։ Փաշինյանը բնակիչներին հիշեցրել է, որ նրանցից յուրաքանչյուրի ձայնը կարևոր է երկրի ապագայի համար։

Քարոզարշավի ընթացքում բնակիչները մոտենում էին Փաշինյանին, ներկայացնում իրենց խնդիրները, սակայն վարչապետը պատասխանում էր «Ժողովուրդ, հիմա քարոզարշավ է, ոչ մի նյութական խոստում։ Ստեփանավանի մի բնակիչ էլ Փաշինյանին խնդրեց, որ նա այցելի Ստեփանավանի փայտե տնակներ, որտեղ մարդիկ ապրում են երկրաշարժից հետո։ Վարչապետն ասաց, որ այս պահին չի խոստանում, սակայն հետո կգան, կծանոթանան խնդրին։ Քաղաքացին հակադարձեց. «Պարոն մարզպետը մեզ անցած տարի խոստացավ, որ կգա, խնդրով կզբաղվի, մինչև այսօր չի եկել»։

Տարածքային կառավարման և ենթակառուցվածքների նախարար Սուրեն Պապիկյանը վարչապետին տեղեկացրեց, որ փայտե կացարանում ապրող մարդկանց մի մասը տարիներ առաջ սեփականության վկայական է վերցրել, այսինքն նրանցից որոշ մասի հանդեպ պարտավորություն ունի պետությունը, բայց մարդիկ կան, որ իրենց խնդիրը պետությունը չի կարող լուծել, Փաշինյանն էլ ասաց. «Դե, ում նկատմամբ պարտավորություն ունի կլուծի, ում նկատմամբ չունի՝ դա լրիվ ուրիշ թեմա է։ Մարդ կա պետությունից ստացել է տունը, ծախել է, էլի գնացել տնակում է ապրում։ Այս տարի մենք 3 մլրդ ենք հատկացրել, որպեսզի աղետի գոտու հետ կապված բոլոր խնդիրները լուծվեն։ Ում պարտք է պետությունը, մենք նրա պարտքը կտանք»։

Վարչապետը նշեց, որ ում նկատմամբ պետությունը պարտավորություն չունի, երկրորդ փուլով կնայեն խնդիրը, քանի որ հնարավոր է մարդիկ լինեն, ում խնդիրը չի ֆիքսվել։

Աղբյուր` Փաստինֆո