Փաստ ինֆո

Մենք ի սկզբանե, անգամ մինչև պաշտոնական գրանցումը, հրապարակել ենք մեր հանձնառությունն ըստ որի, «այո»-ն բացառող ցանկացած տեսակետ կրող հասարակական-քաղաքական միավորները, անկախ անվանումից, հնարավորություն են ստանալու օգտվել մեր հարթակներից։ Այս մասին «Փաստինֆո»-ի հետ զրույցում ասաց «ոչ»-ի շտաբի լիազոր ներկայացուցիչ, իրավապաշտպան Ռուբեն Մելիքյանը, անդրադառնալով բոյկոտի շտաբի հայտարարությանը։

Հիշեցնենք, որ բոյկոտի շտաբը դիմել էր «այո»-ի և «ոչ»-ի շտաբերի լիազոր ներկայացուցիչներին («այո»-ի շտաբի լիազոր ներկայացուցիչ Վահագն Հովակիմյան, «ոչ»-ի շտաբի լիազոր ներկայացուցիչ Ռուբեն Մելիքյան), որպեսզի իրենց հատկացված քարոզչական միջոցներից (եթերաժամեր և այլ հարթակներ) բաժին հանեն նաև բոյկոտի շտաբին:

«Ոչ»-ի շտաբի լիազոր ներկայացուցիչն ընդգծեց՝ հարգանքով են մոտենում գործընկերներին, սակայն «ոչ»-ի կողմից տրամադրվող հարթակից օգտվելու համար կան բովանդակային պահանջներ։

«Մենք պետք է դիտարկենք բովանդակությունը, որպեսզի ատելություն, թշնամանք հրահրող որևէ խոսք չլինի։ Սա կապված չէ կոնկրետ այս հայտարարության հետ։ Սակայն մեր ընտրած ձևաչափը սա է, որպեսզի մենք ունենանք հնարավորություն դիտարկել բովանդակությունը և հարթակ տալ «այո»-ն բացառող տարբերակի ներկայացուցիչներին»,-ասաց Մելիքյանը։

«Այո»-ի շտաբի լիազոր ներկայաուցիչ, ԱԺ «Իմ քայլը» խմբակցության պատգամավոր Վահագն Հովակիմյանն էլ շեշտեց, որ «Հանրաքվեի մասին» օրենքի համաձայն չմասնակցությունը, բոյկոտը նույնականացվում է «ոչ»-ի հետ, այլ կերպ ասած նույնն է, թե «ոչ»-ը «այո»-ից պահանջի «այո»-ի հաշվին քարոզչություն իրականացնել։

«Գուցե իրենց փոխարեն «ոչ» քարոզե՞նք։ Կարող եք իրենց բացատրել, որ մրցակից կողմից պահանջում են իրենց համար քարոզչություն։ Այդ միավորին խորհուրդ տվեք «Հանրաքվեի մասին օրենքն» ընթերցեն ու կպարզեն, որ իրենք ու «ոչ»-ը նույնն են»,-ասաց «այո»-ի շտաբի լիազոր ներկայացուցիչը։

Նրա խոսքով, բոյկոտի անուն տալով շտաբը իր կողմնորոշումը չի փոխում, և բոյկոտի շտաբը իր քարոզչությունը պետք է իրականացնի «ոչ»-ի հետ միասին՝ «ոչ»-ի միջոցներով։

Հեղինակ՝ Սոնա Գեւորգյան

Աղբյուր` Փաստինֆո