Փաստ ինֆո

Արցախի նախագահի թեկնածու Սամվել Բաբայանը ոչ հերքում ոչ հաստատում է իր մուտքը ՌԴ սահմանափակելու վերաբերյալ տեղեկությունները՝ նշելով, որ նման տեղեկատվության չի տիրապետում։ Այս մասին հայտնում է Սամվել Բաբայանի գրասենյակը։

«Եթե Գ. Իսագուլյանը՝ ի դեմս իր հովանավորյալների, ստանձնել է պաշտոնական աղբյուրի դերը, նշանակում է նախ ջանացել է կազմակերպելու Ս.Բաբայանի մուտքի սահմանափակումը, ապա ակտիվորեն շրջանառության մեջ դրել այդ մասին տեղեկությունը»,-ասված է հայտարարությունում:

Հիշեցնենք, որ «Ազգային անվտանգություն» կուսակցության նախագահ Գառնիկ Իսագուլյանն օրերս հրավիրված ասուլիսում հայտարարել էր, որ Մասիս Մայիլյանի և Սամվել Բաբայանի մուտքը ՌԴ արգելվել է։ Նա նշել էր, որ պատճառների մասին խոսել չի կարող, և եթե իրենց շատ է պետք, ապա թեկնածուների գրասենյակները թող ճշտեն պատճառը։

«Սամվել Բաբայանին անձամբ տեղյակ են պահել այդ մասին։ Մինչև այդ դեպքերը Երևանում մի քանի անգամ ես հանդիպել եմ Սամվել Բաբայանին, նա ինձ հրավիրել է Արցախ, ես եղել եմ Արցախում, որտեղ մի քանի հանդիպում ենք ունեցել, մեր զրույցը չի եղել սովորական խնդիրների մասին։ Ինձ թվացել է, որ մենք ունեցել ենք բավականին լուրջ պայմանավորվածություններ, ես պայմանավորվածությունների իմ մասը կատարել եմ, սակայն շաբաթն ուրբաթից շուտ եկավ և հանկարծ Սամվել Բաբայանն արեց հայտարարություն, որը մեր զրույցների հակառակ պատկերն էր։ Այնուհետ նա որոշեց համագործակցել Մասիս Մայիլյանի հետ»,-պատմել էր Իսագուլյանը։

Բաբայանի գրասենյակն անդրադարձել է այս պայմանավորվածությանն ու հայտնել, որ մի քանի հանդիպումների և հեռախոսային զրույցների ընթացքում նույն համառությամբ Գառնիկ Իսագուլյանը Սամվել Բաբայանին առաջարկել էր նախագահական ընտրություններում աջակցել Վիտալի Բալասանյանին՝ խոստանալով բավականին գայթակղիչ պաշտոններ:

«Առաջնորդվելով պետական մտածողությամբ և անդավաճան մնալով «հայ ժողովուրդը ընտրություններից պիտի դուրս գա համախմբված» սկզբունքին՝ Ս. Բաբայանը նպատակահարմար չգտավ համագործակցել Վ. Բալասանյանի հետ՝ փոխարենը սատարելով Մասիս Մայիլյանին, ինչով և պայմանավորված է Ս. Բաբայանի և Մ. Մայիլյանի դեմ ծավալված քարոզչական արշավը»,-նշում է Բաբայանի գրասենյակը:

Հեղինակ՝ Սոնա Գեւորգյան

Աղբյուր` Փաստինֆո