Փաստ ինֆո

«Նման բարբարոսություն կատարողին ցանկացած միջոցով կալանքից հանելը կնշանակի սպայական կազմի նկատմամբ հարգանքի էական իջեցում։ Իրավական առումով չեմ գտնում այնպիսի հիմնավորում, որ սպայի նկատմամբ նման արարք կատարողին հանրային վտանգավորության առումով կարելի էր կալանքից ազատել։ Սա խոսում է իրավական համակարգում կատարելության էական պակասի եւ անձնական շարժառիթներով որոշումներ կատարելու փաստի մասին» , - «Փաստինֆո»-ի հետ զրույցում նման կարծիք հայտնեց «Իրավունքի սահման» ՍՊԸ տնօրեն, պահեստազորի սպա Գեւորգ Հովհաննիսյանը ՝ անդրադառնալով ծեծի ենթարկված փոխգնդապետ Արա Մխիթարյանի գործով մեղադրյալ Զավեն Գրիգորյանի խափանման միջոցի փոփոխությանը։ Վերջինս կալանքից ազատվել է 1.5 միլիոն գրավի դիմաց։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում ։ Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեեւ մամուլի տեղեկություններով`փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ մարզպետը, որը հենց այս աղմուկի հետեւանքով հայտարարեց լիազորությունները վայր դնելու մասին։ Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները։

Գեւորգ Հովհաննիսյանը խափանման միջոցի փոփոխությունը տեղի ունեցած ողբերգության հետ անհամաչափ է գնահատում։ Նրա փոխանցմամբ, Արա Մխիթարյանի ընտանիքը, հարազատները եւ ընկերները խափանման միջոցի փոփոխությունն ընդունում են խիստ բացասաբար։ «Սա առաջացնելու է սոցիալական լարվածություն, քանի որ սա այն դեպքը չէ, որ հասարակությունը հեռու է գնալու տեղի ունեցածի վերաբերյալ գնահատականներ տալուց։ Մարզպետի օգնականի եղբոր նկատմամբ այդ վերաբերմունքը բերում է նրան, որ ավելի շատ արժեւորվում են իրենց կամակատարները, քան սպայական կազմը, որը պահում է երկրի անվտանգությունը»,-ասաց Գեւորգ Հովհաննիսյանը։

Արա Մխիթարյանի վիճակը դեռ կայուն ծանր է։ Նա անգիտակից է։ «Ես մեղք չհամարեմ իմ վրա՝ թերագնահատելու բժիշկների աշխատանքը, բայց նման զարգացումներով, կարծում եմ, որ սրանից հետո ես առողջական վիճակի բարելավման դրական ելք չեմ կարող ակնկալել։ Ինձ մոտ կասկածները հիմնավորվեցին արդեն 100 տոկոսով, որ անպայման էնպես են անելու, որ իրականությունը չպարզվի։ Եթե պետք է ինչ-որ բան պարզել, բնական է, մարդիկ են խոսելու այդ մասին եւ եթե մարդիկ չկան , որ այդ մասին խոսեն եւ իրականությունը պարզվի, ապա ամեն ինչ անելու են, որ այդ մարդիկ չլինեն։ Ես գուցե մեղադրանք եմ հնչեցնում»,-ասաց Գեւորգ Հովհաննիսյանը ։

Դիտարկմանը, թե ասվածը շատ լուրջ մեղադրանք է, այդ թվում բժիշկների՞ն ուղղված, Գեւորգ Հովհաննիսյանն ասաց. «Չէ, ես ասում եմ՝ չեմ թերագնահատում բժիշկների աշխատանքը, բայց ես առաջարկել եմ Արա Մխիթարյանին Բուրդենկո տեղափոխել, Մոսկվա քաղաքում կա շատ լուրջ նյարդավիրաբուժական գիտահետազոտական կենտրոն, որտեղ հրաշքներ են գործում, սակայն ներքին կանոնակարգումների շրջանակում մեզ տեղեկացրին, որ դա հնարավոր չի անել պետության հաշվին, քանի որ ըստ գործող օրենքների եւ կարգերի, տեղափոխումը այլ երկրների առաջատար բուժհաստատություններ հնարավոր է միայն այն դեպքում, երբ առաջնագծում են ստացել մարմնական վնասվածքները, բայց քանի որ Արա Մխիթարյանը վնասվածք է ստացել ոչ մարտական հենակետում, ասացին, որ պետությունն այդ հոդվածով գումարներ չունի»։

Գեւորգ Հովհաննիսյանն ասաց՝ որպես պահեստազորի սպա, որպես «Պահեստազորի զինծառայողների միության» նախագահ վիրավորված է, գոնե նման դեպքում անձինք, որոնք մեղադրվում են սպայի նկատմամբ նման արարք կատարելու մեջ չպետք է դուրս գան կալանքից։
«Հայրը զանգեց, բավականին վրդովված եւ ձեւակերպում արեց՝ սա երկիր չէ, սա թյուրիմացություն է։ Քաղաքացին իր տղային տալով բանակին, որը պահպանելու երկրի անվտանգությունը, ունենալով ծառայողական լուրջ խնդիր, ենթարկվում է բռնության՝ քարով գլուխը ջարդում են, ես որեւէ էական տարբերություն չեմ տեսնում, ոնց որ Գուրգեն Մարգարյանին թուրքը արեց Հունգարիայում...Այո, թող նրանք իմանան, որ իմ կողմից նման որակում է տրվել, սպայի նկատմամբ ձեռք բարձրացնողը թուրք է եւ նրան կալանքից ազատելը նշանակում է իշխանությունների կողմից հովանավորություն թուրքերի նկատմամբ»,-վրդովված ասաց Գեւորգ Հովհաննիսյանը՝ շեշտելով, որ հասարակության մի ստվար զանգվածը զինվորականների շերտն է, որն այս անարդարությունից իրեն վիրավորված է զգում։

Աղբյուր` Փաստինֆո