Փաստ ինֆո

«Հայ Յեղափոխական Դաշնակցության» անդամները ՀՀ վարչապետ Նիկոլ Փաշինյանի հետ օրերս տեղի ունեցած հանդիպմանը քննարկել են համահայկական և տարածաշրջանային հարցեր։ Ներքաղաքական հարցերին անդրադարձ չի եղել, քննարկել են նաև Արցախի հարցը։ Այս մասին այսօր լրագրողների հետ ճեպազրույցում հայտնեց ՀՅԴ ԳՄ ներկայացուցիչ Իշխան Սաղաթելյանը, որը նույնպես մասնակցում էր հանդիպմանը։

Հարցին, հանդիպման նախաձեռնությունը ձե՞րն է եղել, Սաղաթելյանը պատասխանեց. «Տվյալ օրակարգային հարցերի շուրջ փոխադարձ հետարքրքություն է եղել, ուստի տեղի է ունեցել հանդիպում»։

Նա նշեց, որ Փաշինյանի հետ հանդիպումից հետո ՀՅԴ-ի դիրքորոշումներում ոչ մի փոփոխություն տեղի չի ունեցել. «ՀՅԴ-ն պարզ քաղաքական կուսակցությւոն չէ, այն ունի համահայկական կառույց, հետևաբար համահայկական օրակարգ, և մենք միշտ հայտարարել ենք, որ համահայկական օրակարգային հարցերով քննարկումներ ունենալու ենք»։

Հարցին, ամիսներ առաջ դեղին քարտ ցույց տվեցիք, քարտի գույնը հիմա փոխվելու՞ է, ՀՅԴ ԳՄ ներկայացուցիչը պատասխանեց. «Երբ փոխվի անպայման կտեղեկանաք, մենք չենք բացառել, որ քարտի գույնը կփոխվի։ Մեր մոտեցումների, դիրքորոշումների մեջ որևէ փոփոխություն չկա»։

Սաղաթելյանի խոսքով, եթե կան համահայկական, ժողովրդի ճակատագրին վերաբերող հարցեր, ապա ՀՅԴ-ն կարող է տարաձայնությունները մի կողմ դնել և անդրադառնալ ժողովրդի ճակատագրին վերաբերող հարցերին։

ՀՅԴ ԳՄ անդամն ասաց, որ իրենց կուսակցությունը իշխանությունների հետ հանդիպման հարցում չի կաշկանդվում, եթե ասելիք կա ու հարցեր կան, ապա քննարկում են։

Դիտարկմանը, թե լուրեր են պտտվում, որ «այո»-ի հանձնաժողովներում, ՀՅԴ անդամներ կան, ներկայացուցիչը պատասխանեց, որ չգիտի այդ լուրերն ինչ նպատակ են հետապնդում, սակայն ՀՅԴ-ն «այո»-ի հետ որևէ առնչություն չունի և հստակ հայտարարել է հանրաքվեի վերաբերյալ իր դիրքորոշումը։

«Մենք ցանկացած քայլ անում ենք «այո»-ն բացառելու համար, այսինքն ոչ, բոյկոտ, անվավեր, կարևորը «այո» չլինի, քանի որ դա մեր ժողովրդի, պետության իրական հարցերի հետ որևէ առնչություն չունի»,-ասաց Սաղաթելյանն ու նշեց, որ կարևոր հարցերը թողնելով թիթեռ են նկարում։

Խոսելով «ոչ»-ի շտաբում իրենց ներկայացուցիչների մասին, ՀՅԴ ԳՄ անդամն ասաց, որ կոնկրետ չի կարող ասել, թե քանի ներկայացուցիչ կա, սակայն շտաբը դիմել է իրենց և իրենք արգելք չեն հանդիսացել, որպեսզի լիցենզիա ունեցող դաշնակցականները ընդգրկվեն հանձնաժողովներում։

Աղբյուր` Փաստինֆո