Փաստ ինֆո

Ուժային կառույցները գործում են օրենքի սահմաններում եւ ամեն ինչ անում են օրենքի սահմաններում։ Հայաստանում որեւէ մեկը չի կարող հետապնդվել առանց օրենքի տառը պահելու: Այս մասին այսօր լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր Հայկ Սարգսյանը՝ անդրադառնալով նախօրեին ոստիկանների կողմից Արամ Վարդանյանի («Վստրեչի Ապեր») տներում իրականացված գործողություններին:

Նա ընդգծեց, որ այդ դեպքի հետ կապված հասարակության կողմից որեւէ բողոք չկա, որոշ կայքեր են փորձում նման կերպ ներկայացնել:

Հարցին, թե նորմա՞լ է համարում, որ մտնում են բուհ, ձեռնաշղթաներով անձին տանում են, կամ երեխաների աչքի առջեւ հորը բերման ենթարկում, տանում են, վախեցնում են ընտանիքի անդամներին, Հայկ Սարգսյանն արձագանքեց. «Դա որոշում է տվյալ ուժային կառույցը, թե ինչպես պետք է անի, դա կախված է գործի առանձնահատկություններից: Իրենք են ընտրում մեթոդը»:

Դիտարկմանը, թե փաստաբանն ասում է՝ հարցեր են տալիս, ասում՝ ցույց տվեք դատարանի որոշումը, սակայն ոստիկանները ձայն չեն հանում, փաստաբանը հարցնում է՝ լեզու չունե՞ք, ոստիկանն էլ ասում է՝ լեզուս ցույց տա՞մ, որ տեսնես ունեմ, Հայկ Սարգսյանը պատասխանեց. «Դրանք կոռեկտ արտահայտություններ չեն, իսկ իրավապահ համակարգի մասին կասեմ, որ ոչ բոլոր օպերատիվ ծառայություն իրականացնող անձինք իրավունք ունեն բացատրություն տալու և թղթեր ներկայացնելու, հավանաբար դիմել են այնպիսի աշխատակցի, որը տեղեկատվություն հայտնելու իրավասություն չունի»։

«Իմ քայլը» խմբակցության պատգամավորն ընդգծեց՝ համոզված չէ, որ ոստիկանները չեն ներկայացնել խուզարկություն կատարելու համար դատարանի համապատասխան որոշումը։

Անդրադառնալով «Վստրեչի Ապերի» հայտարարարությանը, թե ոստիկաններն իրեն գործարք են առաջարկել, որ արի, քեզ ասֆալտին կփռենք, կնկարահանենք, հետո բաց կթողնենք, Հայկ Սարգսյանն ասաց. «Ես չեմ կարծում, որ նման գործարք ոստիկանության կողմից ներկայացվել է: Կարող եմ ասել, որ ոստիկանության համար հանրությանը վտանգ ներկայացնող կամ քրեական գործով անցնող որեւէ մեկին ասֆալտին պառկեցնելու համար միջնորդություն անելու կարիք չունի: Կարող է դա անել օրենքով սահմանված կարգով»:

Աղբյուր` Փաստինֆո