Փաստ ինֆո

«Գիտեք, նրանք գործադիր իշխանությունը վերցրել են՝ միտինգներով, օրենսդիր իշխանությունը՝ միտինգներով, հիմա փորձում են հանրաքվեով վերցնել նաեւ դատական իշխանությունը եւ, բնականաբար, չորրորդ իշխանության նկատմամբ վերահսկողություն հաստատելը պետք է նրանց օրակարգում լինի: Սա է հիմնական նպատակը»,-«Փաստինֆո»-ի հետ զրույցում ասել է «Մեդիապաշտպան» նախաձեռնության ղեկավար, քաղաքագետ Աղասի Ենոքյանը ՝ անդրադառնալով իշխանության նախաձեռնած վերջին օրենսդրական փոփոխություններին:
Աղասի Ենոքյանն ասում է՝ նպատակն է վերահսկողության տակ առնելու խոսքի ազատությունը: «Գաղտնիք չէ, որ միշտ իշխանությունը ձգտում է ավելի մեծ իշխանության»,-նշում է քաղաքագետը:

Խոսքը, հիշեցնենք, Քրեական օրենսգրքում փոփոխություն կատարելու նախագծի մասին է, որով կառավարությունն առաջարկում է քրեական պատասխանատվություն սահմանել բռնության քարոզի ու կոչերի համար՝ այդ թվում ՝ լրատվամիջոցներով:

«Երեւի իշխանություններն են գնահատելու, մենք այսօր տեսնում ենք, որ այսօր իշխանությունները անընդհատ բռնության կոչեր են տարածում եւս ցանկանում են, որ այստեղ եւ իրենք մենաշնորհ ունենան, այսինքն, բռնության կոչեր տարածելու իրավունք միայն իրենք ունեն»,-նկատում է քաղաքագետը՝ անդրադառնալով հարցին, թե արդյո՞ք Հայաստանն ունի մասնագետներ, որոնք կոմպետենտ կարող են լինել՝ գնահատելու համար, թե այս կամ այն հայտարարությունն իր մեջ պարունակում է արդյոք բռնության կոչեր:

Աղասի Ենոքյանը համոզված է՝ նման գործիքակազմն իր ազդեցությունը թողնելու է նաեւ քաղաքական համակարգի վրա՝ լայն իմաստով: «Մամուլի ազատությունը խեղդելը ինքնին արդեն քաղաքական համակարգի վրա լրջագույն ազդեցություն կարող է ունենալ եւ, բնականաբար, իշխանությունը փորձելու է քաղաքական գործիչներին նույնպես դնել շատ ավելի զգուշավոր իրավիճակներում»,-ասում է «Մեդիապաշտպան» նախաձեռնության ղեկավարը:

Նշենք, որ Քրեական օրենսգրքի նախագծով իշխանությունը մտադիր է ընդլայնել սուտ մատնության հոդվածը։ Ըստ այդմ, սուտ մատնություն կարող է համարվել ոչ միայն իրավասու մարմիններին հանցագործության դեպքի կամ այլ անձանց մասին սուտ տեղեկություն տալը, այլեւ նույնաբովանդակ տեղեկատվության հրապարակումը ԶԼՄ-ներում։
Այս փոփոխությունը եւս Աղասի Ենոքյանը դիտարկում է նույն՝ մամուլի նկատմամբ վերահսկողություն հաստատելու համատեքստում:

Աղբյուր` Փաստինֆո