Փաստ ինֆո

ԱԺ-ն առաջին ընթերցմամբ ընդունեց «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը։

ԱԺ «Լուսավոր Հայաստան» խմբակցության ղեկավար Էդմոն Մարուքյանը տեղեկացրեց խմբակցության որոշման մասին՝ նախագծին դեմ են քվեարկելու. «Կներկայացնենք առաջարկություններ, եթե դրանք ընդունվեն և դատավորների անկախության հետ կապված մեր մտահոգությունները փարատվեն, երկրորդ ընթերցման ժամանակ կողմ կքվեարկենք»,-ընդգծեց Էդմոն Մարուքյանը։

Փաթեթն ունի մի շարք կարգավորումներ, որոնցից մեկով օպերատիվ-հետախուզական միջոցառումներ իրականացնելու թույլտվության գործերը նախատեսվում է վերապահել Երևան քաղաքի ընդհանուր իրավասության դատարանի քրեական գործեր քննող բոլոր դատավորներին։ Մինչդեռ գործող կարգավորմամբ ԲԴԽ-ն հաստատում էր դատավորների ցանկ, որոնք էլ լիազորված էին քննել նմանատիպ գործերը։

Նախագիծը ներկայացնելիս ՀՀ արդարադատության նախարար Ռուստամ Բադասյանը նշել է, որ հստակեցվում են նաև դատավորների գործունեության գնահատման հանձնաժողովի գործառույթները։ Հանձնաժողովը բաղկացած է լինելու 5 անդամից՝ մեկական անդամ երեք ատյանի դատարաններից և երկու իրավաբան-գիտնական. «Իրականացնելու է դատավորների գործունեության գնահատում, մասնավորապես դատական նիստերի կազմակերպման հմտությունները, ողջամիտ ժամկետում գործերի քննության հետ կապված հարցերը և եթե հայտնաբերվեն նյութական կամ դատավարական նորմերի ակնհայտ խախտումներ, ապա նման դեպքերում կարող է դիմել էթիկայի և կարգապահական հարցերի հանձնաժողովին՝ կարգապահական վարույթ հարուցելու հարցը քննարկելու համար»,-ընդգծեց Ռուստամ Բադասյանը։

Օրինագծի փաթեթով դատավորների թեկնածուների հավակնորդների թեկնածությունը ԲԴԽ-ում քննարկելիս հաշվի է առնվելու նաև Կոռուպցիայի կանխարգելման հանձնաժողովի կողմից տրված խորհրդակցական եզրակացությունը։

Փաթեթում կա նաև դրույթ, որով նախատեսվում է դատավորների թեկնածուների տարիքային շեմը 28-ից դարձնել 25։ Նշենք, որ ընդդիմադիր խմբակցություններն այս դրույթը վիճահարույց էին համարում։ ԱԺ «Բարգավաճ Հայաստան» խմբակցության քարտուղար Արման Աբովյանը նշել էր՝ 25 տարեկան նոր ավարտածը չի կարող մարդու ճակատագիր որոշել։

«Եթե մարդ պետք է որոշում կայացնի ուրիշ մարդու կյանքի հետ կապված, նվազագույնը պետք է ունենա կյանքի փորձ։ Կարող է լինել փայլուն, շատ լավ իրավաբան, բայց կան դրույթներ և կան պահեր, երբ նժարի վրա դրվում է մարդու համոզմունքը»,-նշել էր պատգամավորը։

Աղբյուր` Փաստինֆո