Փաստ ինֆո

Այս գիշեր Վստրեչի Ապերի՝ Արամ Վարդանյանի ու նրա հարազատների տներում կատարված գործողությունների արդյունքում ձերբակալվել է երկու անձ՝ Ա.Վարդանյանի եղբորորդուն ու հարեւանին։ Փաստաբան Լ.Սահակյանի փոխանցմամբ՝ քննիչներն ասել են, թե նրանք կասկածվում են կողոպուտի ու առեւանգման մեջ, բայց պարզ չէ, թե ինչ կողոպուտի մասին է խոսքը։

Քննչական խումբ ձեւավորելու մասին որոշումից հասկացել են, որ խոսքը գնում է 2016 թվականին տեղի ունեցած ինչ-որ դեպքի մասին։ Լ.Սահակյանը նշեց, որ բողոքարկել են ձերբակալելու մասին որոշումները։

Ըստ նրա՝ մի շարք անձինք բերման են ենթարկվել։

«Արամ Վարդանյանի հետ որեւէ առնչություն ունեցած անձինք, որոնք հայտնվել են տեսադաշտում, բերման են ենթարկվել, բռնություն է գործադրվել նրանց նկատմամբ, ընդ որում՝ բոլոր դեպքերում ապօրինի են բերման ենթարկվել անձինք, ինչ-որ մտացածին պատճառներով, կասկածանքներով՝ իբրև զենք-զինամթերք պահելու կասկածանքով։ Այս ամենը տեղի ունեցավ այն բանից հետո, երբ վարչապետը հայտարարում է, որ բոլորին պետք է ասֆալտին փռեն և այլն»,- ասաց Սահակյանը՝ նշելով, որ այդպես էլ չհասկացան, թե ում են ասֆալտին ցանկանում փռել։

Նրա խոսքով՝ քրեական ենթամշակույթի դեմ պայքարը գազանության հասավ երեկ գիշեր, երբ ժամը 02-ից հետո հարյուրավոր ոստիկաններ շրջապատել էին բոլոր տների տարածքները և ներխուժել են տներ՝ պատերի վրայով։

«Ոչ ոք ոստիկաններից որևէ բացատրություն չէր տալիս, թե ինչ նպատակով են ընդհանրապես հայտնվել այս տանը և ինչ են ուզում անել այստեղ»,- ասաց Սահակյանը։

Փաստաբանը նշեց, որ հայտարարություն տարածելուց հետո պարզվել է, որ ոստիկաններն ունեցել են ձերբակալման մասին որոշում, մինչդեռ՝ պաշտպանները նույնիսկ տեղյակ չեն, թե ինչ գործի մասին է խոսքը գնում, որովհետև իրենց ոչինչ չի ներկայացվել։ Լուսինե Սահակյանն ասաց, որ ոստիկանությունում եղել են մինչ առավոտ և որևէ մեկը բացատրություն չի տվել, ավելին՝ ոստիկանները տան իրերը կոտրել են փաստաբանների ներկայությամբ և, երբ փաստաբանները հարցնում էին, թե ինչ նպատակով են հայտնվել, սանկցիա ունեն, թե ոչ, միևնույն է՝ պատասխան չեն ստացել։ Փաստաբանը նշեց, որ այդ ամենը տեսանկարահանվել է և շուտով կտարածեն այն։

Մանրամասները՝ տեսանյութում

Աղբյուր` Փաստինֆո