Փաստ ինֆո

Ներողություն եմ խնդրում թեմայից շեղվելու և մի թեմայի անդրադառնալու համար, որն, իմ կարծիքով, չպետք է հնչեր այս բարձր ամբիոնից, սակայն ստիպված եմ, քանի որ Էդմոն Մարուքյանն ու «Լուսավոր Հայաստանը» սկսել են քննարկել շրիշակից ցածր մակարդակի թեմա։ Այս մասին այսօր խորհրդարանում ասաց ԱԺ «Իմ քայլը» խմբակցության պատգամավոր Գևորգ Պապոյանը։

Նա ընդգծեց, որ ըստ երևույթին, Մարուքյանը խիստ սրտնեղելով որոշ անձանց ապօրինի ծագում ունեցող գույքի հնարավոր բռնագրավման հեռանկարից, ընկել է հուզական պոռթկման մեջ, ու իրեն մեղադրել 18 տարեկանում ՀՀԿ-ին անդամակցելու համար։

«Մարուքյանը նշեց, թե կոռուպցիայի մասին հարցերն այն ժամանակ ինչու չէի բարձրացնում։ Հատուկ սրտնեղված Էդմոն Մարուքյանի և «Լուսավոր Հայաստանի» համար ասեմ, որ չէր կարող բարձրացնել, քանի որ ի տարբերություն իրենց, որևէ կապ չեմ ունեցել Սերժ Սարգսյանի իշխանության հետ»,-ասաց Պապոյանը։

Նա պատմեց, որ 2011թ-ին իր հայացքների ու օրվա իշխանության կապ չունենալու համար որոշում է կայացվել բուհում իրեն աշխատանքից զրկել. «Հատուկ Մարուքյանի և ԼՀԿ-ի համար ասեմ, որ մինչև պատգամավոր դառնալս երբևէ չեմ ունեցել պետական պաշտոն, քանի որ ի տարբերություն իրենց չունեի Հանրապետական բարձրաստիճան ծանոթ պաշտոնյաներ»։

«Իմ քայլը» պատգամավորը հայտնեց, որ բուհն ավարտելու օրվանից՝ 2008թ-ից, աշխատել է վաճառող, այնուհետև մարքեթինգի մասնագետ, մարքեթինգի բաժնի պետ, զարգացման գծով փոխտնօրեն ու ինքն իր համար հարթել է իր ճանապարհը։

«Կենսագրությանս հրաշալի հատվածն ավարտվել է նրանով, որ ընտրվել եմ պատգամավոր։ Էդմոն Մարուքյան, այն ժամանակ, երբ ՀՀԿ-ն իշխանության էր ինձ, իմ ծնողին աշխատանքից էին զրկում։ Այն ժամանակ, երբ ՀՀԿ-ն իշխանության էր, ես վաճառող էի աշխատում, հետևաբար չէի կարող այդ հարցերը բարձրաձայնել, բայց Դուք և Ձեր կուսակցության անդամները կարող էիք»,-ասաց Պապոյանը։

Նա ընդգծեց՝ երբ ինքը վաճառող էր ԼՀԿ-ի անդամը Ռոբերտ Քոչարյանի իշխանության տարիներին ոստիկանապետ էր աշխատում. «Դուք այդ հարցերը բարձրացնել կարող էիք, քանի որ, երբ ես վաճառող էի, Դուք, Ձեր խմբակցության անդամը, Սերժ Սարգսյանի իշխանության ժամանակ բանտապետ էր։ Երբ ես վաճառող էի, Դուք, Ձեր խմբակցության մեկ այլ անդամը Ռոբերտ Քոչարյանի իշխանության տարիներին նրա աշխատակազմում վարչության պետ էր, Սերժ Սարգսյանի իշխանության տարիներին, նրա աշխատակազմում վարչության պետ էր աշխատում...»։

Երբ Պապոյանը թվարկում էր նախկին իշխանությունների օրոք ԼՀԿ-ի զբաղեցրած պաշտոնները, Էդմոն Մարուքյանը տեղից արձագանքեց, ինչին Պապոյանը պատասխանեց ասելով. «Խլրտոցներ չլսեմ» ու շարունակեց խոսքը։ Մարուքյանը կրկին ընդհատեց նրա խոսքը, «Իմ քայլը» պատգամավորն ասաց.

«Չխանգարեք, հանգստացեք։ Ձայնդ կտրի՛։ Հանգստացեք, թուլացեք և վայելեք»։
Պապոյանի խոսքով, Մարուքյանը Սերժ Սարգսյանի իշխանության տարիներին չակերտավոր հաղթում էր իշխանության թեկնածուին, ինչը իշխանության թեկնածուի «պարտվելու» միակ դեպքն էր։

«ԱԺ նախագահը մի առիթով իրավամբ նշեց, որ կա աքսիոմա՝ ընդդիմադիր գործիչները մի շարք օրենքների, այդ թվում իշխանության բյուջեի նախագծին դեմ են քվեարկում։ Պարոն Միրզոյան, ներողություն եմ խնդրում, բայց փաստորեն բացառություն էլ կա, Էդմոն Մարուքյանն իրեն համարելով կլասիկ պատգամավոր, այդ չգրված կլասիկ կանոնն էլ է խախտել՝ կողմ քվեարկելով ՀՀԿ-ի բյուջեներին։ Այո, հիրավի, դաժան մարդ է Սերժ Սարգսյանը»,-ասաց պատգամավորը։

Նա՝ դիմելով քաղաքացիներին ասաց, որ իր գլուխը բարձր է կենսագրության ամեն մի էջով, քանի որ ոչ միայն չի գողացել ու չի թալանել, այլև չի կեղծել, չի խաբել, տերեր երբեք ման չի եկել ու սիրելի փեսայի սիրելի սիրելին կամ հաճախորդը երբեք չի փորձել դառնալ։

Աղբյուր` Փաստինֆո