Փաստ ինֆո

Փետրվարի վերջին օրերն էին, երբ մտածում էինք մի երկու օրով Ծաղկաձորի Արարատ ռեզորտ հյուրանոցում երկօրյա հանգիստ անցկացնել, մանավանդ, լեռնադահուկային շրջանին, ձմեռային Ծաղկաձորի հմայքներին քիչ ժամանակ էր մնացել: Նշածս հյուրանոցը Ծաղկաձորի քաղաքային հատվածում էլ չէ և բնականաբար, ճոպանուղուն մոտ չէ, սակայն մինչև մարտի վերջը բոլոր համարները զբաղված էին: Այսինքն, հասկանալի է, չէ՞, որ օլիմպիական համալիրը և մյուս բոլոր հարակից հանգստավայրերն առավել քան լեցուն պիտի լինեին, մարդիկ նախապես պիտի ամրագրած լինեին իրենց նախընտրելի հյուրանոցները, ինչը Ծաղկաձորի համար նորմալ է, քանի որ լեռնադահուկային տուրիզմի սեզոնն է և դրա սիրահարների համար հրաշալի վայր է Ծաղկաձորը: 

Պատկերացնում եք, չէ՞, թե կիսամյակային 100 փաստերի համատեքստում Փաշինյանը ո՜նց էր ներկայացնելու ձմեռային տուրիզմի ցուցանիշները՝ որպես տնտեսական հեղափոխության հերթական նվաճում:

Բայց եկեք տեսեք, որ ներկա իշխանությունն իր ոչ ադեկվատ գործողություններով իր հայտարարած թեզերի դեմ է գործում: Հակառակ դեպքում՝ ինչպե՞ս կարող էր Փաշինյանը հրապարակայնորեն, ի լուր աշխարհի հայտարարել, թե կորոնավիրուսի հաստատմամբ մեկ և կասկածանքով մի քանի հիվանդների տարել և մեկուսացրել են Ծաղկաձորում գտնվող Գոլդըն Փելես հյուրանոցում:

Եվ սրանից հետո բնական չէ՞ր, ասենք, աշխարհի տարբեր երկրներից մարտ ամսին Ծաղկաձորում հյուրանոցային համարներ ամրագրած բազմաթիվ զբոսաշրջային ընկերությունների կողմից ծաղկաձորյան հանգստի չեղարկումները: Ի վերջո, մարդիկ այս օրերին ուշի ուշով հետևում են կորոնավիրուսի աշխարհագրական քարտեզին, և որքան էլ Փաշինյանն իր ընտանիքի հետ ցուցադրաբար Երևանից ուղևորվի Ծաղկաձոր մարտիմեկյան ընթրիքի՝ ձեռքի հետ էլ ռեստորաններում մոնիտորինգ անցկացնելով ու հայտարարելով, թե այնտեղ ռեստորանները լի են մարդկանցով և այլն, զբոսաշրջիկին առաջնորդելու է իր զգուշավորությունն ու ապահովությունը, այլ ոչ թե՝ Փաշինյանը հավաստիացումները:

Ընդ որում, ուշագրավ է, որ հենց այսօր լրագրողների հետ ճեպազրույցի ընթացքում ԲՀԿ նախագահ Գագիկ Ծառուկյանն անդրադարձավ իշխանությունների ծաղկաձորյան ֆիասկոյին՝ նրանց հորդորելով գնալ և սեփական աչքերով տեսնել, թե ինչպիսին է վիճակը երկրի կարևոր զբոսաշրջային կենտրոնում:

Ամեն Աստծո օր տնտեսական հեղափոխությունից խոսող և կամայական ցուցանիշներ հրապարակող Փաշինյանը, ըստ էության, իր անհեռատես քայլերով և քաղաքականությամբ դեռ չսկսված՝ գուժում է իր իսկ ձևակերպած տնտեսական հեղափոխության վախճանը:

Իսկ կորոնավիրուս կոչվող վարակը բացի մարդկային կյանքեր խլելուց, համաշխարհային տնտեսության ճգնաժամի մոտիվներից մեկը կարելի է դիտարկել, որի դիմակայմանը Հայաստանը որպես պետություն այնքան անպատրաստ է բոլոր առումներով: Իշխանության հատվածական, անկազմակերպ և տարերային քայլերը ավելի շատ խուճապային իրավիճակ են ստեղծում:

Դիմակայումը մարդկանց, անհատների և ընտանիքների ինքնակազմակերպումն է:

Հեղինակ՝  Մարինե Մինասյան

Աղբյուր` Փաստինֆո