Փաստ ինֆո

Ջանջուղազյանին հարցրել ե՞ք՝ ծրարով փող ստացե՞լ է, թե՞ ոչ։ Եթե ինքը չի ստացել, ապա կարող է տեսել է՝ ով է ստացել։ Այս հարցով այսօր ԱԺ-ում ՀՀ վարչապետ Նիկոլ Փաշինյանին դիմեց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Բազմիցս նշել եք, որ նախկին կառավարության օրոք նախարարները ծրարներով աշխատավարձեր են ստացել։ Ձեր կաբինետում նախկին կառավարությունից մարդիկ կան, նրանց հարցրե՞լ եք ծրարով փող ստացել են, թե ոչ»,-հարցրեց Էդմոն Մարուքյանը։

ՀՀ վարչապետ Նիկոլ Փաշինյանն էլ նկատեց՝ այնպես չէ, որ նման տեղեկություններ կան միայն Էդմոն Մարուքյանի մատնանշած շրջանակի մարդկանց մասին.

«Այդպիսի տեղեկություններ կան նաև նախկին նախարարների մասին, ովքեր հիմա ԱԺ պատգամավոր են, և ես այդ նախկին նախարարներին չեմ կանչել, հարցրել՝ ճիշտ ա, թե չէ։ Կան մարմիններ, կզբաղվեն ու այդ հարցերի պատասխանները կտան։ Էս ամբիոնից ասե՞մ էդ ինչ օպերատիվ տեղեկություն ա, ում մասին ա և ինչ կարգի վճարման մասին է։ Դա ինչքանո՞վ ճիշտ կլինի»,-ասաց վարչապետը։

Վարչապետը նկատեց՝ ո՞վ է ասել, որ այդ հարցը միայն պետք է վերաբերվի նրանց, ովքեր հեղափոխությունից առաջ են եղել կառավարության անդամ։

Վարչապետի խոսքով այդ հարցը վերաբերվում է նաև նրանց, ովքեր հեղափոխությունից հետո են եղել կառավարության անդամ. «Իրանց մասին էլ օպերատիվ բնույթի տեղեկություններ կան։ Սա չի նշանակում, որ այդ տեղեկությունները կան, անպայման հաստատվելու են»,-ասաց վարչապետը։

Աղբյուր` Փաստինֆո