Փաստ ինֆո

Եթե անձն ապրում է իր եկամուտների համեմատ անհամաչափ, շռայլ կյանքով, ապա դա կարող է հիմք հանդիսանալ, որ ուսումնասիրություններ սկսեն այդ մարդու գույքի և եկամուտների հետ կապված։ Այս մասին այսօր լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր Հովհաննես Իգիթյանը։

Հարցին, ինչպե՞ս եք վերահսկելու մարդու կենցաղը, Իգիթյանը պատասխանեց. «Մենք այդ գործընթացը զրոյից չենք սկսում։ 2003թ-ին ՄԱԿ-ն ընդունեց կոռուպցիայի դեմ պայքարի կոնվենցիա, որտեղ 20-րդ հոդվածում նշված է, այն դեպքերում, երբ պաշտոնյան չի կարող հիմնավորել իր գույքն ու համապատասխան բացատրություն բերել, թե որտեղից են իր եկամուտները, ապա ոչ թե պետությունը պետք է ապացուցի գույքի օրինականությունը, այլ ինքը պետք է ապացուցի, թե որտեղից է գույքը»։ Ըստ նրա՝ երբ պաշտոնյայի գույքը, կարողությունները իրականի հետ համեմատած ունենում է 25 մլն դրամի տարբերություն, ապա այդ դեպքում սկսում են ուսումնասիրություններ։

Նա ընդգծեց, որ փոփոխությունը գումար վերադարձնելու համար չէ, այլ մեծ կարողություններ ունեցող մարդկանց գույքն ու հաշիվներն ուսումնասիրելու նպատակ ունի։

Անդրադառնալով Թուրքիայի արտաքին գործերի նախարարի և ԵԱՀԿ Մինսկի խմբի համանախագահների հանդիպմանը, Իգիթյանն ասաց. «Մինսկի խմբի համանախագահներն այդ հարցով հայտարարություն չեն արել, սակայն սովորաբար անում էին։ Ինձ թվում է, որ չեն անելու, քանի որ Չաղուշօղլուի հայտարարությունը կամ հանդիպման ժամանակ հնչեցրած խոսքերը, հակասում են Մինսկի խմբի համանախագահների այս 20 տարիների հայտարարություններին, որովհետև Մինսկի խումբը միշտ նշում է սկզբունքները, որի շուրջ պետք է լուծվի հարցը»։

Պատգամավորն ասաց, ինքը ռուս-թուրքական հարաբերությունների սրացում չի նկատել և Թուրքիան դուրս է մնացել իր գործընկերների ու դաշնակիցների ծրագրերից. «Թուրքիան խախտել է բոլոր իր գործընկերների և դաշինքների պայմանավորվածությունը։ Խոսքը միայն Ռուսաստանի մասին չէ, պարզ է, որ Ռուսաստանը խնդիր ունի Թուրքիայի հետ և Թուրքիան էլ Ռուսաստանի, որովհետև ամբողջ աշխարհը, այդ թվում Ռուսաստանը, Սիրիայում խաղաղության հասնելու պլան ունի, իսկ Թուրքիան խախտեց այդ պլանը»։

Աղբյուր` Փաստինֆո