Փաստ ինֆո

Արմեն Բիլյանը կապ չունի ոստիկան Գագիկ Մկրտչյանի վիրավորման հետ։ Այս մասին «Սասնա Ծռեր 1» գործով այսօրվա դատական նիստում նման ցուցմունք է տվել «Սասնա Ծռեր-2» գործով ամբաստանյալ Թորոս Թորոսյանը։ 

Ամբաստանյալն այսօր ներկայացվել էր «Սասնա ծռեր-1» գործով դատական նիստին, որտեղ ներկայումս վկաների հարցաքննության փուլն է։

Նա հայտարարեց, թե ինքն է լարանով կապել Գագիկ Մկրտչյանի ձեռքը։

Մեղադրող դատախազ Պետրոս Պետրոսյանի հարցին, թե որտեղից այն տեղեկատվությունը, որ Բիլյանը կապ չունի Մկրտչյանի վիրավորման հետ, Թորոսյանն ասաց. «Որովհետև կողքս է կանգնած եղել՝ անցակետում»։

Դատախազի դիտարկմանը, որ Թորոսյանի ցուցմունքը հակասում է, քանի որ վերջինս նշել էր, որ Բիլյանը 10 րոպեի չափով է գտնվել իր տեսադաշտում, այնուհետև՝ 30 րոպե անց տեսել է այլ տարածքում, Թորոսյանը պատասխանեց, որ նման բան չի ասել։

Դատախազի հարցին, թե որքան ժամանակ անց է Գագիկ Մկրտչյանը գնացել անցակետ՝ Թորոսյանը հրաժարվեց պատասխանել։

Գագիկ Մկրտչյանի այրու հարցին, թե արդյո՞ք Արամ Հակոբյանն է ուղեկցել Գագիկ Մկրտչյանին՝ գնդի տարածքից դուրս, Թորոսյանն ասաց՝ չի հիշում։

Նախագահող դատավոր Մեսրոպ Մակյանի հարցին, որ Պավել Մանուկյանի ցուցմունքի համաձայն՝ Գագիկ Մկրտչյանը վիրավորում է ստացել Էդվարդ Գրիգորյանի կողմից արձակված պատահական մենահատ կրակոցից, Թորոսյանն ասաց, որ տեղյակ չէ։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո