Փաստ ինֆո

ԵԱՀԿ Մինսկի խմբի համանախագահներն ունեն իրենց աշխատանքային պլանը, որի մեջ ներառված է նաև հանդիպումներ ԵԱՀԿ Մինսկի խմբի անդամ պետությունների, միջազգային կազմակերպությունների հետ և այդ հանդիպումները նորություն չեն։ Ազգային ժողովում այս մասին ասաց ՀՀ արտաքին գործերի նախարար Զոհրաբ Մնացականյանը՝ անդրադառնալով օրերս ԵԱՀԿ Մինսկի համանախագահների և Թուրքիայի արտգործնախարարության հանդիպմանը։

«Արտառոց որևէ բան չկա։ Այդ հանդիպումները պլանային են և Մինսկի խմբի համանախագահներն իրականացնում են իրենց գործառույթը։ Ամբողջողվին վստահելով Մինսկի խմբի համանախագահներին՝ մենք շատ լավ գիտենք այդ պլանի մասին և գիտենք՝ ինչպես և ինչ մոտեցումներով են Մինսկի խմբի համանախագահներն աշխատում, որովհետև մենք ենք աշխատում նրանց հետ» ,-ասաց ԱԳ նախարարը՝ հավելելով, որ սա առաջին հանդիպումը չէ։ Վերջինս նկատեց՝ դրանից առաջ էլ հանդիպումներ են եղել մի շարք այլ երկրների հետ, և սա բնականոն աշխատանք է։ Զոհրաբ Մնացականյանն ընդգծեց՝ այդ առումով որևէ մտահոգություն չունեն։

«Միգուցե տարբերությունը մի փոքր նրանում էր, որ Թուրքիայի կողմից եղավ մեկնաբանություն։ Ի դեպ, եթե շատ անկեղծ լինենք, այդ մեկնաբանության մեջ էլ չկար որևէ բան, որը մենք նախկինում չէինք լսել, և մենք այդ առումով հանդես եկանք մեր հայտարարությամբ։ Հայաստանի և հայ ժողովրդի նկատմամբ ոչ բարեկամական քաղաքականությամբ, որը ԼՂ հակամարտության համատեքստում արտահայտվում է նաև Ադրբեջանին ցուցաբերվող միակողմանի ռազմաքաղաքական աջակցություն, Թուրքիան չի կարող ԼՂ հիմնախնդրի խաղաղ կարգավորման գործընթացում որևէ դերակատարում ունենալ»,-հավելեց Զոհրաբ Մնացականյանը։

ԱԺ «Լուսավոր Հայաստան» խմբակցության պատգամավոր Տարոն Սիմոնյանը, դիմելով ԱԳ նախարարին, ասաց. «Ձեր հանգստությունը կկիսեի, եթե տարածաշրջանային այս իրադարձությունների բովում տեղի չունենար այդ հանդիպումը և դա որպես ինչ-որ առումով արտաքին քաղաքականության ուղեգիր չնշմարվեր նույն Թուրքիայի ԱԳՆ-ի կողմից»,-նշեց Տարոն Սիմոնյանը։

Աղբյուր` Փաստինֆո