Փաստ ինֆո

Տուրիստական միկրոավտոբուսների վարորդներն այսօր բողոքի ակցիա են իրականացրել՝ պահանջելով թույլ տալ մեքենաները կայանել Հանրապետության հրապարակում և զբաղվել տուրիստական գործունեությամբ։

«Թող մեզ հրապարակում տրամադրեն մեկ գիծ, որը չի խոչընդոտում երթևեկությանը, քաղաքի գեղեցկությանը, լավ տեսանելիությանը։ Մինչև այսօր՝ 10 տարուց ավել է, մենք կանգնել ենք հրապարակում և այնտեղից, շատ քաղաքակիրթ ձևով, բոլոր ստանդարտներին համապատասխան մեքենաներով տուրիստական գործունեություն ենք ծավալել»,-այս մասին այսօր լրագրողների հետ ճեպազրույցում ասաց ակցիայի մասնակիցներից մեկը։

Նա պատմեց, որ սովորաբար ամանորյա տոների կապակցությամբ հրապարակը փակվում է և այս տարի էլ, ինչպես ամեն տարի, Կառավարության որոշմանը համահունչ մեքենաները հեռացրել են Հանրապետության հրապարակից, այնուհետև պատկան մարմինները պարզաբանել են, որ հունվարի 13-ից հրապարակը կբացվի, սակայն որոշվել է տոնածառը հավաքել հունվարի 25-ին, և իրենք ընդառաջել են Կառավարության որոշմանն ու մեքենաները չեն կայանել հրապարակում։

«Նոր տարուն տուրիստների հոսքն ավելի շատ է, սակայն մենք ընդառաջ գնացինք այս որոշմանը։ Արդեն հունվարի 25-ին հրապարակում ճանապարհային նշանները դրեցին, որ կայանելը չի թույլատրվում և մամուլով տեղեկացրին, որ այսուհետ Հանրապետության հրապարակում մեքենաների կայանատեղին արգելվում է»,-նշեց տուրիստական միկրոավտոբուսներից մեկի աշխատակիցը։

Նա հայտնեց, որ դիմել են Կառավարությանը, որտեղից հորդորել են դիմում ներկայացնել, սակայն հասկացել են, որ դա կառավարության գործառույթը չէ ու դիմել են քաղաքապետարան։ Իսկ քաղաքապետարանից ասել են, որ լուսանկարներ տրամադրեն ու նշեն, թե որ հատվածում են ցանկանում կայանել իրենց տուրիստական միկրոավտոբուսները։

Ակցիայի մասնակիցներն ընդգծում են, որ պատրաստ են հավուր պատշաճի հարկեր վճարել միայն թե թույլ տան շարունակել իրենց գործունեությունը։

«Մարդիկ ոչնչից տեղյակ չլինելով, ասում են, որ այս քայլ ճիշտ է, քանի որ հրապարակը դարձել է «բազառ»։ Մենք հրապարակը ո՛չ «բազառի», ո՛չ տաքսիների կայանատեղիի չենք վերածել։ Ո՛չ բամբակի, ո՛չ արևածաղկի, ոչնչի հետ կապ չունենք, մենք դեմ ենք դրան։ Բայց նաև դեմ ենք, որ 50 ընտանիքի զրկում են աշխատանքից ու ասում հաջողություն։ Թող օրենքով չափանիշներ սահմանեն ու կայանատեղի տան»,-ասաց ակցիայի մեկ այլ մասնակիցը։

Ակցիայի մասնակիցների հետ զրուցեց քաղաքապետարանի աշխատակիցներից մեկն ու ասաց՝ Սախորովի հրապարակում կամ այլ տարածքում կայանելու հնարավորություն կտան, սակայն տուրիստական միկրոավտոբուսների վարորդները պնդեցին, որ իրենք Հանրապետության հրապարակում են ցանկանում կայանել մեքենաները, քանի որ տուրիստներն այնտեղ են։ Քաղաքապետարանի աշխատակիցը շեշտեց, որ խնդիրը չի կարող լուծվել փոքր խմբի շահերից ելնելով, տուրիստական գործունեությամբ զբաղվող քաղաքացիներն էլ արձանագրեցին, որ «փոքր խմբերին իշխանությունները բանի տեղ չեն դնում»։

Քաղաքապետարանի մամուլի խոսնակ Հակոբ Կարապետյանը հակադարձեց, նշելով, որ մինչ այժմ ոլորտը կարգավորված չի եղել, հիմա աշխատում են այն կարգավորելու ուղղությամբ։

Մոտ 15 րոպե տևող բանավեճից հետո, քաղաքապետարանի աշխատակիցներն ասացին, որ այսօր պատրաստվում են քննարկում իրականցնել և օրվա ավարտին պարզ կլինի, թե քաղաքի որ հատվածում տարածք կհատկացնեն տուրիստական միկրոավտոբուսների համար։

Աղբյուր` Փաստինֆո