Փաստ ինֆո

2019 թվականին տեղի է ունեցել աշխատողների թվաքանակի էական աճ։ Այս մասին լրագրողների հանդիպման ժամանակ ասաց ՊԵԿ հարկային վարչարարության կազմակերպման, դիտարկման և հսկողության վարչության պետ Կարեն Թամազյանը։

«2019 թվականի դեկտեմբերի հարկային հաշվարկներով հարկման բազա ապահոված աշխատատեղերը եղել են շուրջ 625 հազար, որը նախորդ տարվա նույն ժամանակահատվածի համեմատ շուրջ 88 հազարով ավել է»,-ասաց ՊԵԿ պաշտոնյան։

Վերջինս նաև ներկայացրեց՝ որ ոլորտներում է գրանցվել աշխատողների թվի աճը։ Հիմնական աճը տեղի է ունեցել մանրածախ առևտրի ոլորտում, հանրային սննդի կազմակերպման ոլորտում, մեծածախ առևտրի ոլորտում, սննդամթերքի արտադրության և ծառայությունների մատուցման ոլորտում։

Անդրադառնալով հարցին՝ ինչի արդյունքում է տեղի ունեցել աշխատողների թվաքանակի աճը, ՊԵԿ պաշտոնյան նկատեց՝ հարկային մարմնին աշխատակիցների քանակը հետաքրքիր է այնքանով, որքանով նրանք ապահովում են հարկման բազա. «Այս աճը պայմանավորված է ինչպես հարկային վարչարարության, նոր աշխատատեղերի ստեղծման, այնպես էլ հարկ վճարողների ինքնահայտարարագրման արդյունքում»,-ասաց Կարեն Թամազյանը։

Վերջինս նաև հայտնեց՝ 2019 թվականին տպվել է 457 մլն ՀԴՄ նախորդ տարվա 326 մլն.-ի փոխարեն։ 2020 թվականին ՊԵԿ-ի համար թիրախային են լինելու մանր ձեռնարկատերերը, որոնք երբեմն խորամանկության են դիմում։ Երբ դրա շրջանառությունը գերազանցում է օրենքով սահմանված 24 մլն. Դրամը փակում են ձեռնարկությունը, հետո նոր ձեռնարկություն են բացում՝ նպատակ ունենալով շարունակել գործունեությունը նույն կարգավիճակով։ Կարեն Թամազյանի խոսքով այս պահի դրությամբ 32 հազ. սուբյեկտ հայտ է ներկայացրել, որպեսզի համարվի միկրոձեռնարկության սուբյեկտ։

Աղբյուր` Փաստինֆո