Փաստ ինֆո

«Մեր այսօրվա իշխանության ողբերգությունը, որը դառնում է պետական ու ազգային ողբերգություն, այն է, որ իրենք ոչ իրենց ասածի իմաստն են հասկանում, ոչ դրա իրավունքն ունենալ-չունենալու խնդիրն է երբեւէ իրենց անհանգստացնում, ոչ էլ գիտակցում են, թե ինչ ծառայությունների մասին են խոսում եւ ինչ են ասում»,- «Փաստինֆո»-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով իրավապահ համակարգերում դավաճանների մասին ՀՀ վարչապետ Նիկոլ Փաշինյանի հայտարարությանը ։

Իսագուլյանի խոսքով, եթե երկրի վարչապետը ասում է, որ այդ ծառայություններում կան դավաճաններ, նշանակում է՝ երկրի ղեկավարն ինքը ամենամեծ դավաճանն է , որովհետեւ , ըստ Իսագուլյանի, նույնիսկ եթե այդ համակարգերում հայտնաբերվում են մարդիկ, ովքեր դավաճանություն են արել, այդ մասին չեն խոսում, մինչեւ օրինական ուժի մեջ մտած դատավճռով չի ։

Հիշեցնենք, որ կոռուպցիայի դեմ պայքարի խնդիրներին նվիրված իրավապահ համակարգի ներկայացուցիչների հետ խորհրդակցությանը վարչապետ Փաշինյանը հայտարարեց, որ «իրավապահ համակարգի ամենավերին օղակներում եղել են բառիս բուն իմաստով դավաճաններ, որոնք կոռուպցիայի դեմ հայտարարված պայքարի ծխածածկույթի տակ առաջնորդվել են այլ հաշվարկներով և այլ հանձնարարություններով»: Իսկ խորհրդարանում ԼՀԿ-ական պատգամավոր Գեւորգ Գորգիսյանը ԱԱԾ տնօրենի ԺՊ-ից հետաքրքրվեց, թե ինչ բացահայտումներ են հետեւել այս հայտարարությանը, ինչին ի պատասխան Էդուարդ Մարտիրոսյանը նշեց, որ «ինքնամաքրման գործընթացով ենք զբաղվելու, ԱԱԾ-ն մաքրվելու է այն անձանցից, որոնք դավաճան են, հայրենասեր չեն և արատավորում են սպայի պատիվը»։ ԱԱԾ տնօրենի պաշտոնակատարը, սակայն, կոնկրետ արդյունքների վերաբերյալ որեւէ բան չասաց, նշեց միայն, որ հենց ունենան տվյալներ, կտեղեկացնեն:

«Հատուկ ծառայություններն այն մարմիններն են, որոնց ամեն ասած խոսքի հետեւում պետք է անպայման փաստը դրված լինի, ընդ որում, օրինական ուժի մեջ մտած դատավճռով փաստ, որ դա եղել է, այն էլ՝ որոշում են կայացնում, որ ասելը մեր պետականությանը օգուտ կբերի՞, թե չէ»,-շեշտեց Իսագուլյանը՝ արձանագրելով, որ հիմա որեւէ փաստ չունենալով, ամբիոնից հայտարարվում է, որ այդ համակարգում աշխատում են դավաճաններ։

«Նշանակում է ՝ ամենամեծ դավաճանը իրենք են՝ համակարգի գլուխը այսօր վարչապետն է»,-նշեց Գառնիկ Իսագուլյանը։
Իրավապահ համակարգում դավաճանների մասին հայտարարությունից առաջ նախ վաղ վարչապետը «դավադիր ուժեր» էր փնտրում Արցախում, հետո խոսեց գործակալների մասին, ապա պետական համակարգում հակահեղափոխականների։ Ուշագրավ է սակայն, որ Նիկոլ Փաշինյանի հիշյալ հայտարարություններին որեւէ իրավական գործողություններ չհետեւեցին, մինչդեռ երկրի ղեկավարի հնչեցրած որակումները, ըստ էության քրեաիրավական գնահատական են ենթադրում։

«Պատկերացրեք, որ համակարգի ամեն մի աշխատակից շարքայինից մինչեւ ղեկավար, կարող է իր վրա վերցնել, մտածել՝ ուրեմն ինչ-որ բան կա, երկրի վարչապետն է ասել։ Հո չե՞ն պատկերացնում, որ վարչապետը սուտ է ասում, նա պահի տակ է, ասել, սա ողբերգություն է ։ Արցախում դավաճաններ կան...այս մարդիկ ապրում են դավաճանների մանիայով»,-ասաց Իսագուլյանը

Մեր զրուցակցի համոզմամբ, սա ոչ միայն անվտանգության խնդիր է, այլեւ ւ ցույց է տալիս, որ անվտանգություն , որպես այդպիսին գոյություն չունի։

«Այն մարդիկ, ովքեր ի պաշտոնե պարտավոր էին այն իրականացնել, այդ համակարգերին համարում են դավաճան, թշնամի համակարգեր։ Դուրս է գալիս՝ բոլորին պետք է գործից ազատել ու սորոսականներին ընդունել աշխատանքի»-եզրափակեց Գառնիկ Իսագուլյանը։

Աղբյուր` Փաստինֆո