Փաստ ինֆո

25 տարեկան նոր ավարտածը չի կարող մարդու ճակատագիր որոշել։ Այս մասին ԱԺ-ում «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթի քննարկման ժամանակ ասաց «Բարգավաճ Հայաստան» խմբակցության քարտուղար Արման Աբովյանը։

Վերջինս վիճահարույց է համարում այն դրույթը, որով նախատեսվում է դատավորների թեկնածուների տարիքային շեմը 28-ից դարձնել 25։

«Եթե մարդ պետք է որոշում կայացնի ուրիշ մարդու կյանքի հետ կապված, նվազագույնը պետք է ունենա կյանքի փորձ։ Կարող է լինել փայլուն, շատ լավ իրավաբան, բայց կան դրույթներ և կան պահեր, երբ նժարի վրա դրվում է մարդու համոզմունքը»,-նշեց պատգամավորը՝ իշխանական գործընկերներին խորհուրդ տալով ուսումնասիրել ԱՄՆ ֆեդերալ դատավորների տարիքային շեմը, ինչպես նաև Անգլիայի օրինակը։

Արման Աբովյանը նաև կողմ չէ մեկ փաթեթով այսչափ կարևոր հարցեր բարձրաձայնելուն. «Դրույթներ կան, որոնց հետ համաձայն ենք, դրույթներ կան, որոնք պետք է քննարկվեն, բայց առանձին-առանձին բոլոր դրույթները պետք է քննարկվեն։ Այսպիսի մեծ փաթեթով բերել այսպիսի կարևորագույն փոփոխություններ սխալ է»,-ընդգծեց Արման Աբովյանը։

Աղբյուր` Փաստինֆո