Փաստ ինֆո

Երեկվանից բարեբախտաբար իրադրության նեգատիվ որևէ փոփոխություն չունենք։ Կորոնավիրուսի կանխարգելման աշխատանքները համակարգող հանձնաժողովի ընդլայնված նիստի ժամանակ այս մասին հայտարարեց ՀՀ վարչապետ Նիկոլ Փաշինյանը՝ ամփոփելով նիստը։

«Կորոնավիրուսով հիվանդացության նոր դեպք չունենք։ Այս ընթացքում մի քանի կասկածելի դեպքեր ախտորոշվել են և պատասխանը բացասական է։ Այս պահի դրությամբ սպասում ենք 9 թեստի պատասխանի, որոնց մասին հանրությանը կտեղեկացնենք»,-ասաց վարչապետը՝ հույս հայտնելով, որ պատասխանները բացասական կլինեն, սակայն եթե հաստատվեն վարչապետն ընդգծեց՝ դա չպետք է խուճապի առիթ լինի։ Վարչապետն արձանագրեց, որ սա հաղթահարելի հիվանդություն է.

«Առայժմ մեր միակ ախտորոշված դեպքի համար նույնիսկ հիվանդությունն այնպիսի ընթացք ունի, որ փաստորեն նա չի բուժվում, որովհետև ոչ մի բողոք, ախտանշան ընդհուպ ջերմություն չունի։ Կարճ ջերմություն է ունեցել, հետո այդ ջերմությունն իջել է, հիմա ուղղակի մարդը սուր վարակիչ հիվանդանոցում, սենյակում հեռուստացույց է նայում»,-նշեց վարչապետը։

Վերջինս անդրադարձավ նաև Ծաղկաձորի «Գոլդեն փելես» հյուրանոցում կարանտինի շրջանում գտնվող քաղաքացիներին, որոնցից որևէ մեկի մոտ ախտանշան ի հայտ չի եկել։ Վարչապետի վստահեցմամբ նրանք չունեն ջերմություն, ինքնազգացողության հետ կապված խնդիրներ չունեն. «Երեկվա ընթացքում 3-4 կասկածելի դեպք ենք ախտորոշել և բոլորը բացասական։ Այսօր կհասցնենք 9 հոգուն թեստավորել, եթե առաջին պատասխանը դրական է լինում, կրկնակի թեստավորում նույնպես արվում է»,-հավելեց Նիկոլ Փաշինյանը։

Աղբյուր` Փաստինֆո