Փաստ ինֆո

Կորոնավիրուսի հետ կապված իրավիճակի վերաբերյալ տեղեկատվական խառնաշփոթ է, իշխանության ներկայացուցիչները հանրությանը հակասական ուղերձներ են հղում:

«Փաստինֆո»-ի հետ զրույցում նման կարծիք է հայտնել ռազմական փորձագետ Կարեն Վրթանեսյանը՝ անդրադառնալով նոր կորոնավիրուսի հետ կապված տեղեկատվական հոսքերին:

«Տեղեկատվության ոլորտում իշխանությունը որոշ աշխատանք կատարում է, հարցազրույցներ են տալիս, հայտարարություններ են անում, բայց մի բան ակնհայտ է, որ նախ կա խառնաշփոթ եւ դա անզեն աչքով է երեւում»:

Փորձագետը նշում է, որ իշխանության տարբեր ներկայացուցիչներ պարբերաբար հնչեցնում են միմյանցից տարբերվող հայտարարություններ, ինչը հանրության շրջանում մտահոգությունների տեղիք է տալիս:

«Օրինակ, առողջապահության նախարարը հայտարարում է, որ դպրոցներ փակելու կարիք չկա, սոցապ նախարարը նույնիսկ հեգնում է ծնողներին, որոնք մտահոգ են՝ երեխաներին դպրոց տանել , թե ոչ, իսկ դրանից ժամեր անց որոշում է կայացվում դպրոցներում դասերը հետաձգելու մասին: Երկրորդ օրինակը, Նիկոլ Փաշինյանը գիշերվա ժամը 5-ին հայտարարում է մի բան, որը ժամեր անց հերքում է եւ հակառակն է հայտարարում: Նույնը տարրական կորոնավիրուսից խուսափելու քայլերից մեկը մարդաշատ վայրեր չայցելելն է, բայց դրանից հետո Նիկոլ Փաշինյանը ընտանիքով սկսում է այցելել Ծաղկաձորի ռեստորանները եւ ասում, որ դրանք բազմամարդ են»,-նշում է Կարեն Վրթանեսյանը։

Հիշեցնենք, որ վարչապետ Փաշինյանը տեղեկացրել էր, որ Հայաստանում արձանագրվել է նոր կորոնավիրուսի մեկ դեպք: Խոսքը Իրանից հատուկ չվերթով վերադարձած քաղաքացու մասին է: Փաշինյանը նախ Ֆեյսբուքում գրել էր, որ վերջինս օդանավակայանից տաքսի է նստել եւ միջոցառումներ են ձեռնարկվում տաքսու վարորդին հայտնաբերելու ուղղությամբ, ապա տեղեկացրեց, որ կորոնավիրուսով վարակված քաղաքացին օդանավակայանից հեռացել է ծանոթի մեքենայով: Նշենք, որ նույն չվերթով Իրանից Հայաստան վերադարձած ՀՀ քաղաքացիները մեկուսացված են Ծաղկաձորի Գոլդեն Փելես հյուրանոցում, ինչ էլ, ըստ էության, պատճառն էր այն բանի, որ վարչապետն ընտանիքով շրջի Ծաղկաձորի ռեստորաններով եւ լուսանկարների միջոցով փորձի ցույց տալ, թե որեւէ խնդիր չկա եւ առողջարանային քաղաքում կյանքն իր հունով ընթանում է:

Կարեն Վրթանեսյանը հիշեցնում է, որ մշտապես հնչում են հայտարարություններ, որ տեղեկատվությունը պետք է ստանալ բացառապես պաշտոնական աղբյուրներից, ինչը անշուշտ կարեւոր է եւ նման իրավիճակներում անհրաժեշտ, սակայն , մյուս կողմից, ըստ փորձագետի, նույն այդ աղբյուրները իրարամերժ տեղեկություններ են հրապարակում:

«Ակնհայտ է, որ բնակչությանը տեղեկատվություն փոխանցելու պետական համակարգը նորմալ չի աշխատում: Այստեղ կա եւ համապատասխան գերատեսչությունների եւ անձամբ Փաշինյանի եւ այն կառույցների մեղքը, որոնք կան կառավարությունում ու ենթադրաբար, պետք է զբաղվեն այդ աշխատանքով»,-շեշտում է Կարեն Վրթանեսյանը՝ ընդգծելով, որ նման իրավիճակներում առհասարակ տեղեկատվության հաղորդման մեկ օղակ պետք է գործի:

«Ընդհանրապես, անհասկանալի է տեղեկատվության հաղորդման այս մոտեցումը: Անհրաժեշտ է, որ լինի կոմունիկացիայի մեկ կետ, այսինքն, լինի մի մարդ, որը խոսելու է կորոնավիրուսի թեմաներով եւ մյուսները պետք է իրեն չխանգարեն, մյուսները պետք է ինֆորմացիա պատրաստեն, ստուգեն ու համաձայնեցնեն տվյալները: Ցանկալի է, որ այդ մարդը համաճարակաբան լինի՝ գուցե ԱՆ կամ ԱԻՆ պատասխանատու, բայց պետք է լինի մարդ, որը այդ ամենից հասկանում է»,-շեշտում է Կարեն Վրթանեսյանը:

Կարեն Վրթանեսյանի կարծիքով այս պահին Հայաստանում կորոնավիրուսի հետ կապված խուճապ չկա, կան անհանգստություններ, որոնք կային վաղուց՝ դեռ այն պահից, երբ Իրանում հայտնաբերվեց կորոնավիրուսը:

«Այն պահին, երբ Իրանում հայտնաբերվեց կորոնավիրուսը, Հայաստանում եւս մտահոգություններ կային, որոնք բարձրաձայնվում էին, բայց իշխանությունը չէի ասի , թե տեղին էր արձագանքում դրանց»,-ասաց փորձագետը:

Հավելենք, որ այսօր Նիկոլ Փաշինյանը կառավարությունում կորոնավիրուսի կանխարգելման աշխատանքային խմբի ընդլայնված կազմով նիստի ժամանակ տեղեկացրել է, որ այս մեկ օրվա ընթացքում կորոնավիրուսով հիվանդացության նոր դեպք չունենք:

«Այս պահի դրությամբ սպասում ենք 9 թեստերի պատասխանների եւ պատասխանները լինելուն պես հանրությանը կտեղեկացնենք»,-ասել է վարչապետը:

Աղբյուր` Փաստինֆո