Փաստ ինֆո

«Կարանտինի շրջանում գտնվող մարդկանց Ծաղկաձորում տեղավորելը մեծ հիմարություն էր, որովհետեւ, նախ, Ծաղկաձորը համարվում է տուրիստական քաղաք, երկրորդ, հիմա՝ տուրիստական սեզոնի պիկն է, լեռնադահուկասպորտով զբաղվող բազմաթիվ մարդիկ են այնտեղ գնում ՝ նաեւ արտասահմանից»,- «Փաստինֆո»-ի հետ զրույցում նման կարծիք հայտնեց բիզնես խորհրդատու Արեն Ապիկյանը։՝ կորոնավիրուսով հիվանդանալու ռիսկային խմբում գտնվող ՀՀ քաղաքացիներին Ծաղկաձորի Գոլդեն Փելես հյուրանոցում տեղավորելու իշխանության որոշմանը:

Արեն Ապիկյանն ասում է, նոր վիրուսի հետ կապված ամբողջ աշխարհում է խուճապային իրավիճակ, որը նաեւ Հայաստան է հասել, իսկ ՀՀ իշխանությունը նման պայմաններում, տուրիստական կենտրոնում է մեկուսացնում մարդկանց:
«Մենք դրանով կտրում ենք ոչ միայն այսօրվա տուրիստների հոսքը, որովհետեւ շատերը արդեն իսկ լքում են Ծաղկաձորը , այլեւ նպաստում, որ նրանք , ովքեր պլանավորում են հանգստանալ Ծաղկաձորում , չգան: Հիմա մենք ասում ենք ՝ ոչ միայն վիրուսի դեմը չենք առել, այլեւ նպաստում ենք տարածմանը, մենք պոտենցիալ հնարավոր հիվանդ մարդկանց տանում ենք ու տեղավորում տուրիստական քաղաքի կենտրոնում ՝ ինչ-որ հյուրանոցում, որն ընդհանրապես, հարմարեցված չէ բժշկական ծառայություններ մատուցելու համար: Օրինակ, հիվանդանոցներում գետնին գորգ չի լինում, հյուրանոցը հարմարեցված չէ մարդկանց բժշկական օգնություն ցուցաբերելու համար: Ես կադրեր տեսա, թե ինչպես են մարդկանց ուտելիքը բաժանում, երբ մարդը դուռը բացում է՝ առանց դիմակի: Դա շատ թեթեւամիտ մոտեցում է համաշխարհային մակարդակի լուրջ հարցին»,-նշում է Արեն Ապիկյանը:

Հիշեցնենք, որ այս պահին Ծաղկաձորի «Գոլդեն փելես» հյուրանոցում կարանտինի շրջանում է գտնվում ՀՀ 31 քաղաքացի, որոնք վարչապետի վստահեցմամբ ապահովված են ամեն ինչով։ Սա այն հյուրանոցն է, որը կառավարությանն է նվիրել ՀՀ մաքսային կոմիտեի նախկին ղեկավար Արմեն Ավետիսյանի ընտանիքը եւ այն վաճառելու համար նախկինում երկու անգամ հայտարարված աճուրդը չեղարկվել է՝ գնորդ չլինելու պատճառով։ Հյուրանոցի գինը, որը նախկինում միլիոնավոր դոլարներ էր գնահատվում, կորրցնում է իր գինը։

Սոցիալական ցանցերում տեղեկություններ էին շրջանառվում, որ մի շարք քաղաքացիներ չեղարկում են իրենց արդեն իսկ ծրագրված այցերը Ծաղկաձոր: Վարչապետ Նիկոլ Փաշինյանը այս տրամադրությունները կանխելու նպատակով կիրակին ընտանիքով անց է կացրել Ծաղկաձորում:

Ավելի վաղ «Փաստինֆո»-ն տեղեկացրել էր, որ կորոնավիրուսի վտանգը լուրջ խնդիրներ է առաջացրել Հայաստանի ներգնա տուրիզմի ոլորտում։ Դեռ մինչեւ Հայաստանում կորոնավիրուսի առաջին դեպքի մասին պաշտոնական տեղեկատվությունը, «Տուրիզմ Արմենիա» ասոցիացիայի նախագահ Սյուզաննա Ազոյան ը մեզ հայտնել էր, որ վիրուսի վտանգի պատճառով մասսայաբար չեղարկվում են մարտ-ապրիլ ամիսների համար նախատեսված բոլոր տուրերը։
Կորոնավիրուսի տարածումը կանխարգելող աշխատանքները համակարգող հանձնաժողովի ընդլայնված նիստն ամփոփելիս ՀՀ վարչապետ Նիկոլ Փաշինյանն ասաց, որ Ծաղկաձորում խուճապի մասին լուրերը խիստ չափազանցված են։ Վարչապետն ասաց, որ Ծաղկաձորում ընտանիքի հետ շրջել է մի քանի ռեստորաններում, սրճարաններում, շրջել է քաղաքում և տեսել է շատ զբոսաշրջիկների. «Այնպես որ եկեք վերաբերվենք հանգիստ, հանդարտ, իհարկե զգոն և ուշադիր՝ հասկանալով, որ հիվանդությունը վտանգավոր է, բայց կառավարելի է և հույս ունենք՝ իրավիճակը չի սրվի»:

«Ես կարծում եմ, որ այդ չմտածված քայլը մեծագույն վնաս է հասցնելու մեր տնտեսության ու տուրիզմի ոլորտին: Ես հասկանում եմ, որ գուցե պետությունը այլ ազատ շինություններ , հիվանդանոցներ չուներ, բայց դա լուծում չէ, ավելի լավ էր արագ շարժական հիվանդանոց սարքեին եւ մարդկանց կարանտինի տակ այնտեղ պահեին»,-կարծում է բիզնես խորհրդատուն:

Ինչ վերաբերում է փաստին, որ քաղաքացիները արդեն երեկվանից սկսել են մեծ քանակությամբ մթերք կուտակել, Արեն Ապիկյանի խոսքով, դա խուճապի դրսեւորում է: Մարդիկ կարծում են, որ Չինաստանի նման վիրուսը տարածվելու է եւ պետք է սնունդ ունենալ: «Իհարկե, ազդելու է տնտեսության վրա, եթե հիմա չկանխվի այս խուճապը, ունենալու ենք նույն իրավիճակը, ինչն ունենք դիմակների եւ բժշկական պարագաների դեպքում: Մարդիկ փորձելու են սպեկուլյացիա անել»,-համոզված է մասնագետը:

Ապիկյանը չի բացառում, որ բժշկական դիմակների նման պարենային մթերքի գնաճ լինի, եթե իրավիճակը չվերահսկվի: «Եթե այսօր սուպերմարկետների դարակներն են դատարկվում, այդ խուճապը սննդամթերքի դեֆիցիտ է առաջացնելու: Եթե այսպես շարունակվեց, որոշ ժամանակ անց մեր արտադրանքը չի բավականացնելու, իսկ եթե սահմաններն էլ փակվեն, Աստված մի արասցե, այդ ժամանակ մենք ներմուծել էլ չենք կարողանա եւ ցավոք, պետությունն իր գործողություններով նպաստում է այդ պանիկայի տարածմանը, ոչ թե կանխում է դա»:

Արեն Ապիկյանի խոսքով, առումով, բացի մի քանի զարգացած երկրներից, ամբողջ աշխարհը պատրաստ չէ այս իրավիճակին, բայց այն , ինչ մեր կառավարությունն է անում, շատ անլուրջ ու ոչ պրոֆեսիոնալ մոտեցում է:

«Եթե 2-3 դեպք էլ գրանցվի, ինձ թվում է բավականին լուրջ պրոբլեմների առջեւ ենք կանգնելու»,-եզրափակում է Արեն Ապիկյանը:

Աղբյուր` Փաստինֆո