Փաստ ինֆո

Այս իրավիճակին պետք է բավականին լուրջ վերաբերվել, բայց առաջացած խուճապը շատ ավելի լուրջ է և սխալ հետևանքներ կարող է ունենալ։ Լրագրողների հետ զրույցում այս մասին ասաց ԱԺ առողջապահության և սոցիալական հարցերի մշտական հանձնաժողովի նախագահ Նարեկ Զեյնալյանը։

Անդրադառնալով հանրաքվեի հետ կապված քարոզարշավները և մասսայական այլ միջոցառումները հետաձգելու կարծիքներին՝ Նարեկ Զեյնալյանը նկատեց՝ դա կախված է իրավիճակի փոփոխությունից։ 
«Հիմա քարոզարշավի հետ կապված գործողություններ են ընթանում։ Ակտիվ քարոզչության փուլ դեռ չենք մտել, բայց քարոզչությունն իրականացվում է, նախապատրաստական, կազմակերպչական բնույթի հարցերը լուծվում են»,-ասաց Նարեկ Զեյնալյանը՝ հավելելով, որ քաղաքացիների հետ հանդիպումներ այս պահին Երևանում նախատեսված չեն, իսկ մարզերում հանդիպումներ ընթանում են։ Նարեկ Զեյնալյանը վստահեցրեց՝ այս պահին իրավիճակը վերահսկելի է. «Պետք չի թերագնահատել, պետք է բավականին լուրջ վերաբերվել այս հարցին։ Այսինքն լուրջ պատրաստվել, պլանավորել ամեն ինչ, բայց ի հակառակ սրան պետք չէ հավելյալ խուճապային տրամադրություններ ստեղծել»,-նշեց Նարեկ Զեյնալյանը։

Ինչ վերաբերում է դիմակների հարցին, Նարեկ Զեյնալյանը տեղյակ չէ կառավարությունն այս պահի դրությամբ գնելու փորձեր կատարում է, թե ոչ, սակայն կարծում է՝ կկատարվի հավելյալ պահեստավորում փորձեր գնելու արտասահմանից. «Դիմակները 100 տոկոսով չեն կանխում վարակվելը։ Դրա հավանականությունը կա։ Դիմակը կրելու պարագայում չի նշանակում, որ մարդիկ 100 տոկոսով ապահովագրված են»,-նշեց Նարեկ Զեյնալյանը։

Դիտարկմանը՝ որքանով է ճիշտ կարանտինի մեջ գտնվող քաղաքացիներին պահել Ծաղկաձորի «Գոլդեն փելես» հյուրանոցում, Նարեկ Զեյնալյանն արձագանքեց.

«Ընդամենը կարանտինի տարածք է նախատեսված, որտեղ դատարկ տարածք է, այնտեղ կարանտին զոնա է։ Այդ մարդիկ ընդամենը շփվել են վարակակրի հետ, գտնվում են 24-ժամյա հսկողության տակ, գանգատներն են ստուգվում, ջերմաչափում է կատարվում և գանգատի առկայության դեպքում, բնականաբար, կտեղափոխվեն արդեն կլինիկա։ Այդ պահին պետք էր օպերատիվ որոշում կայացնել այնպիսի մի տարածք, որտեղ փակ է, այլ մարդ չկա։ Հիվանդանոց տանելը, միանշանակ, սխալ էր, քանի որ այդ մարդիկ ապացուցված վարակակիր չեն, ընդամենը կասկածելի անձինք են, որոնք շփում են ունեցել վարակակրի հետ»,-ընդգծեց Նարեկ Զեյնալյանը։

Աղբյուր` Փաստինֆո