Փաստ ինֆո

«Սեւ փիարը տարածված է ամբողջ աշխարհում եւ Հայաստանը բացառություն չէ»,-«Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով համացանցում տարածված լուսանկարներին, որտեղ պատկերված է սահմանադրական հանրաքվեի «ՈՉ» քարոզչական կողմի «հուղարկավորությունը»: Էջմիածնում «Այո»-ի կողմնակիցները «ՈՉ»-ի «հուղարկավորությունն» էին կազմակերպել եւ լուսանկարել

Արմեն Բադալյանի խոսքով, տեղի ունեցածը բարոյական նորմերից դուրս է, սակայն բարոյականությունը քաղաքականության մեջ տեղ չունի: «Նման բաները ցանկալի չեն, բայց, ցավոք, դրա դեմ որեւէ կերպ չես կարող պայքարել: Ատելություն կարող ենք ասել, բայց այնուամենայնիվ, դա սեւ փիար է, չես կարող ապացուցել՝ դա եղել է կազմակերպված գործողություն, թե ասենք, ինքնաբուխ մի բան»,-մեզ հետ զրույցում ասաց քաղտեխնոլոգը՝հավելելով, որ դա այն նույն ձեռագրի շարունակությունն է, որը կար 2018 թվականի մայիսին, երբ ՀՀԿ-ական գործիչների բակերում սեւ ժապավեններ էին փակցնում ու դագաղներ դնում:

Արմեն Բադալյանի խոսքով, աշխարհում, ինչպես եւ Հայաստանում քաղաքական ու բարոյական հարթությունները երբեք չեն հատվում: Քաղտեխնոլոգը չի կարծում , որ սեւ փիարի այս դրսեւորումը կարող է ազդեցիկ լինել. «Մի քանիսը կնայեն, մի քանիսը կծիծաղեն, մի քանիսը կտարածեն եւ վերջ, կանցնի -կգնա: Դա ընդհանրապես ազդեցություն չունի»:

Ըստ քաղտեխնոլոգի՝ «Ոչ» -ի շտաբը պետք է արհամարհի նման գործողությունները, որովհետեւ գրագետ աշխատանքի դեպքում կարող է հաջողության հասնել: «Այո»-ի համար լուրջ խնդիր է լինելու 850 հազար մասնակցությունն ու 650 հազար «Այո»-ն: Դա կարող է ապահովվել միայն, երբ «Ոչ»-ը ընդհանրապես որեւէ բան չի անում, իսկ «Այո»-ն գրագետ է, ինչը ես չեմ տեսնում, երկրորդ, երբ վարչական ռեսուրս է օգտագործվում եւ երրորդ՝ ընտրանկարչություն: Այս երեքի համատեղությամբ միայն կարելի է 850 հազար մասնակցությունն ու 650 հազար «Այո» ունենալ»,-համոզված է քաղտեխնոլոգը:

Ինչ վերաբերվում է «Ոչ» -ի անունից քաղաքացիներին գումար բաժանելու մասին սոցցանցերում արված գրառումներն, քաղտեխնոլոգը շեշտեց՝ ահազանգը պետք է ստուգվի եւ պարզվի, թե իրականում ովքեր են գումար բաժանում:

«Ես չեմ կարծում, թե գումար կբաժանեն, որովհետեւ, իրականում միշտ գումար բաժանում են «Այո» ասելու համար: Հնարավոր է, որ գումար բաժանեն «Ոչ»-ի անվան տակ, որպեսզի մարդիկ վերցնեն եւ հետո ասեն՝ սա «Ոչ»-ի շտաբն էր, ամեն ինչ հնարավոր է: Հնարավոր է՝ իրականում «Ոչ»-ը լինի, հնարավոր է՝ «Այո»-ն, «Ոչ»-ի հեղինակությունը գցելու նպատակով , հնարավոր է նաեւ երրորդ կողմ լինի, փաստացի նախընտրական կամպանիա է, որի ժամանակ թույլատրելի եւ անթույլատրելի ամեն ինչ օգտագործվում է»,-ասաց քաղտեխնոլոգը՝ շեշտելով, որ գումար բաժանելը քրեական հանցագործություն է:

Նշենք որ «Ոչ» -ի շտաբի ղեկավար Ռուբեն Մելիքյանը ֆեյսբուքյան գրառմամբ իրավասու մարմիններին էր դիմել մի օգտատիրոջ գրառման մեջ նշված փաստով անհապաղ քրեական գործ հարուցելու պահանջով։ Ըստ այդ օգտագիրոջ գրառման, «ՈՉ»-ի անունից ընտրակաշառք է բաժանվել: Իսկ ավելի վաղ «ՈՉ»-ի շտաբի անդամ Արսեն Բաբայանի հրապարակումն էր ուղարկվել է ոստիկանություն՝ կրկին ֆեյսբուքյան օգտատիրոջ կողմից հայտնած տեղեկության վերաբերյալ, իբրեւ թե թոշակառուներին «ՈՉ»-ն առաջարկել է 5000-ական դրամներ, որպեսզի նրանք չմասնակցեն հանրաքվեին։

Աղբյուր` Փաստինֆո