Փաստ ինֆո

«Վարչապետների անունները, որ հայտարարվել է, նրանց հետ համաձայնությունը կա, նրանք պատրաստ են գալ դատարան, կարծում եմ, որ խնդիրներ չպետք է լինեն»,-լրագրողների հետ ճեպազրույցում հայտարարել է  ՀՀ երկրորդ նախագահ Ռոբերտ Քոչարյանի որդի Լևոն Քոչարյանը՝ անդրադառնալով ՀՀ եւ Արցախի պաշտոնաթող վարչապետերի՝ անձնական երաշխավորությամբ Ռոբերտ Քոչարյանի խափանման միջոցը փոխելու միջնորդության մասին հարցին։

Լեւոն Քոչարյանը շնորհակալություն հայտնեց նրանց նախաձեռնության համար եւ ասաց, որ գիտի՝ նրանք էլ պատկերացնում են, թե ինչ հարձակումների են ենթարկվելու իշխանամերձ շրջանակների կողմից։

Հիշեցնենք,  ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանն, ինչպես նաև Արցախի Հանրապետության նախկին վարչապետ Անուշավան Դանիելյանը ՀՀ երկրորդ նախագահ Ռոբերտ Քոչարյանի խափանման միջոց կալանքն իրենց անձնական երաշխավորությամբ փոխարինելու միջնորդություն կներկայացնեն դատարան։

ՀՀ 2-րդ նախագահի պաշտպանական թիմի անդամ Հայկ Ալումյանը  «Փաստինֆո»-ին տեղեկացրել է, որ խափանման միջոցի փոփոխության միջնորդության անհրաժեշտությունը չի լինի, եթե դատարանը որոշի դադարեցնել ապօրինի հետապնդումը, իսկ եթե որոշի, այդուհանդերձ շարունակել, ապա նախքան երաշխավորության միջնորդությունը ներկայացնելը դատարանում քննարկման առարկա կդառնա դատավորին ինքնաբացարկի մասին  2020 թվականի հունվարի 9-ի ներկայացված միջնորդությունը։  

«Դժվար է հավատալ, որ տիկին Դանիբեկյանը կիրականացնի արդարադատություն։ Մենք արդեն քանի ամիս է՝ ականատես ենք լինում, որ նա ենթարկվում է ճնշումների»,-ասել է Լեւոն Քոչարյանը՝ անդրադառնալով դատարանից ակնկալիքներին։ Նա հիշել է , թե ինչ տեղի ունեցավ դատավորների հետ, ովքեր իշխանությանը անցանկալի որոշումներ  էին կայացրել։

«Դատավոր Դանիբեկյանը, կարծես, հենց հետեւում է նրան, ինչ իրենից ակնկալում են իշխանությունները։ Շատ ակնկալիքներ չկան, շատ լավ կլինի, եթե նա որոշի իր մեջ խիզախություն ու քաջություն գտնել, վերադառնալ օրինական դաշտ եւ իրականացնել արդարադատություն՝ առանց հետին  մտավախությունների»,-ասել է Լեւոն Քոչարյանը։

Աղբյուր` Փաստինֆո