Փաստ ինֆո

Հայաստանում, ինչպես ցանկացած այլ երկրում առկա է կորոնավիրուսի ի հայտ գալու վտանգ։ Խնդիրը նրանում է, որ մեզ մոտ առաջացող խուճապը չի կառավարվում։ «Փաստինֆո»-ի եթերում նման կարծիք հայտնեց «Կոնսիլիում» ՀԿ նախագահ Գևորգ Գրիգորյանը՝ նկատելով, որ խուճապն առաջանում է ինֆորմացիայի պակասի և նախարարության փակ աշխատանքի արդյունքում։

Մասնագետը նշում է՝ կորոնավիրուսը սովորական վիրուս է, սակայն եթե սեզոնային գրիպի վիրուսից մահացությունը 0.1 տոկոս է, ապա կորոնավիրուսից մահացությունը 2.1 տոկոս է, այդուհանդերձ, մասնագետը հորդորում է խուճապի չմատնվել։ Պետք է պարզապես ոլորտային ճիշտ քաղաքականություն վարել։

«Մեր տարեց բնակչությունը, որն ունի խրոնիկ հիվանդություններ, պետք է լինի ուշադրության կենտրոնում։ Պետք է ուժեղացված պոլիկլինիկական ծառայություն լինի, տներով մարդկանց զանգեն, յուրաքանչյուր ընտանեկան բժիշկ իր տեղամասը վերցնի հսկողության տակ»,-նշեց Գևորգ Գրիգորյանը՝ ընդգծելով, որ պետք չէ խուճապի մատնվել, եթե նույնիսկ կա կորոնավիրուս։ Պետք է համակարգված գործողությունների հաջորդականությամբ շարժվել, որպեսզի կորոնավիրուսը սահմանափակվի կոնկրետ դեպքերի քանակով և վիրուսի բռնկում տեղի չունենա։

Սակայն մասնագետի կարծիքով Առողջապահության նախարարության փակ քաղաքականությունը, նախարարության փակ աշխատանքը, թերացումների ծածկադմփոցը ստեղծում է մի իրավիճակ, երբ մարդիկ սկսում են ստել բժիշկներին, որպեսզի կարողանան իրենց ապահովագրել։

«Այսօր պետք է զբաղվենք ժողովրդին կորոնավիրոսւի դեպքերի ի հայտ գալուն պատրաստելով, որպեսզի հետո անկառավարելի քաոս չսկսվի։ Իսկ նախապատրաստելն այն է, որ օրինակ վարչապետի հավաքը չեղարկվի, ասեն, որ վտանգ կա։ Թու թու թու-ն, Աստված չանին, երեք պտույտ սեփական առանցքի շուրջ պտտվելը, սպիտակ օձիքը կծելը կորոնավիրուսից չի օգնում։ Սազական չէ նման հայտարարություններով հանդես գալ այն պարագայում, երբ համաշխարհային առողջապահության կազմակերպությունն ասում է՝ արտակարգ իրավիճակ է»,-նշեց Գևորգ Գրիգորյանը։

Վերջինս նկատեց՝ Առողջապահության նախարարն ասում է խուսափել հանրային վայրերի այցելությունից, մինչդեռ վարչապետը հանրահավաք է կազմակերպում. «Ո՞վ է մեղավոր լինելու, եթե հանկարծ բռնկում լինի նախարա՞րը, թե՞ վարչապետը։ Այս հակասությունը նրան է բերում, որ ժողովուրդը չի հասկանում՝ ում հավատա»,-ընդգծեց Գևորգ Գրիգորյանը։

Ինչ վերաբերում է սահմաններին, ապա մասնագետը պնդում է՝ ժամանակավորապես բոլորի հետ սահմանը պետք է փակել. «Իտալիան, ըստ վիրուսի տարածվածության, զբաղեցնում է երրորդ տեղը, այնտեղ չեղարկվում են ֆուտբոլային խաղեր, նորաձևության ցուցադրություններ, բայց Իտալիայի հետ պահպանում ենք հաղորդակցությունը, այսինքն չվերթներն իրականացվում են։ Մի քանի օր առաջ ընկերս Իտալիայից ժամանել է և պատմում է՝ թուղթ են լրացրել, անցել։ Հաջորդ օրը զանգահարել ու հարցրել են՝ ջերմել է, թե ոչ և վերջ։ Նման դեպքերում պետք է ավելի կտրուկ քայլերի դիմել, պետք չէ, որ բռնկում լինի»,-ասաց Գևորգ Գրիգորյանը։

Վերջինս չբացառեց, որ վիրուսը գուցե ներթափանցած լինի Հայաստան. «Բայց չեմ էլ կարող փաստել, որ կա, որովհետև նման հստակ տեղեկատվություն փաստացի չունեմ»,-նշեց Գևորգ Գրիգորյանը։

Մանրամասները՝ տեսանյութում

Աղբյուր` Փաստինֆո